Bul týraly baspasóz máslıhaty barysynda ShQO Densaýlyq saqtaý basqarmasy basshysynyń orynbasary Vladımır Lı málim etti.
«Elimizde sońǵy eki aıda epıdemıologııalyq jaǵdaı nasharlap ketti. Qazaqstan koronavırýs juqtyrý kórsetkishi boıynsha «qyzyl» aımaqqa kirdi. Biraq Shyǵys óńiri ázirshe «jasyl» aımaqta tur. Qaýipti derttiń taralýyn azaıtý úshin kóptegen sharalar qabyldanýda. Onyń ishinde 1 aqpannan bastalatyn vaksınasııa koronavırýs ınfeksııasyn juqtyrǵandardy tómendetýge jáne shekteý sharalaryn jeńildetýge múmkindik beredi», dedi ol.
«QR Halyq densaýlyǵy jáne densaýlyq saqtaý júıesi týraly» kodeksiniń 77-babyna sáıkes kez kelgen medısınalyq prosedýra, onyń ishinde vaksınasııa ekpe salynatyn azamattardyń kelisimimen ǵana júrgiziledi.
«Qazirgi ýaqytta daıyndyq júrip jatyr. Aqpan aıynyń basynda vaksınalardy tasymaldaý jáne saqtaý úshin oblystyń barlyq medısınalyq mekemelerine 16 bıomedısınalyq muzdatqysh pen kóp ret qoldanylatyn termotirkegishi bar 60 termokonteıner satyp alynady. COVID-19-ǵa qarsy vaksınasııany uıymdastyrý jáne egý boıynsha 358 medısına qyzmetkeri oqýdan ótti», dep atap ótti Vladımır Lı.
Sonymen qatar, vaksınasııa kezeńinde monıtorıng júrgizý jáne ádisnamalyq kómek kórsetý úshin arnaıy komıssııa qurylyp, alǵashqy medısınalyq-sanıtarlyq kómek uıymdarynyń basshylary qatarynan jaýapty tulǵalar belgilendi.
