Densaýlyq saqtaý mınıstrliginiń aqparaty boıynsha, Pavlodar oblysyna COVID-19-ǵa qarsy vaksınanyń barlyǵy 80 myń dozasy bólindi.
«Gam-KOVID-Vak» (Spýtnık V) preparatynyń alǵashqy – 1 200 dozasy 31 qańtarda aımaqqa jetkizilip, Ǵ.Sultanov atyndaǵy Pavlodar oblystyq aýrýhananyń qoımasyna jetkizildi. Ǵ.Sultanov atyńdaǵy Pavlodar oblystyq aýrýhana kólemi 2,2 tekshe metr muzdatqyshpen jabdyqtalǵan. Jaqyn arada qoımaǵa 1,2 tekshe metr bolatyn taǵy úsh arnaıy muzdatqysh qoıylady. Qajet bolǵan jaǵdaıda medısına qyzmetkerleri oblystyq qan ortalyǵynyń qoımasyn iske qosady, onda 0,48 tekshe metr muzdatqysh ornatylǵan», delingen oblystyq Densaýlyq saqtaý basqarmasynyń habarlamasynda.
Qalalar men aýdandardaǵy 31 emhanaǵa preparattar termokonteınerlerde jetkiziletin bolady. Vaksınalaý úshin alǵashqy medısınalyq-sanıtarlyq kómek mekemelerinde barlyǵy 107 egý kabıneti daıyndalǵan.
Egý naýqanyn sapaly ótkizý úshin 1125 medısına qyzmetkeri daıyndyq kýrsynan ótti. Vaksınasııa erikti negizde júrgiziledi.
