Saltanatty kesh barysynda teatr dırektorynyń orynbasary Almas Shoman mýzykalyq qoıylymǵa kelgen medısına qyzmetkerlerine ujym atynan alǵysyn bildirdi.
– Jazýshy M.Áýezovtiń «Abaı–Toǵjan» mýzykalyq dramasy búgin medısına salasynyń qyzmetkerlerine arnaıy sahnalandy. Qazirgi pandemııa jaǵdaıynda aýyr indetpen kúresip jatqan dárigerlerdiń eńbegi orasan ekeni bárimizge málim. Bizdiń ártisterimizdiń sizderge arnalǵan qoshemeti men qurmetin qabyl alyńyzdar, – dedi ol.
Qoıylymdy tamashalaýǵa 50-ge jýyq medısına qyzmetkeri jınaldy. Atap aıtsaq, Nur-Sultan qalasynyń №4, №7, №9 qalalyq emhanalarynan jáne Ulttyq neırohırýrgııa ortalyǵy men Ulttyq ǵylymı kardıohırýrgııa ortalyǵynan keldi.
– Búgingi qoıylymdaǵy akterlerdiń sheberligi men mýzykalyq aspaptardyń jandy dybystary janymyzdy jadyratpaı qoımady. Biz óte qýanyshtymyz. Teatr ujymy bizge osyndaı keremet kóńil kúı syılady, shattana otyryp tamashaladyq. Sol úshin alǵysymdy bildiremin. Koronavırýstyń emi tabylyp, tezirek búkil álem pandemııanyń qursaýynan shyqsa eken deımin. Elimiz aman bolsyn, – dedi №4 qalalyq emhananyń dárigeri Araılym Seıdanova. Al №9 qalalyq emhananyń meıirbıkesi Nazerke Berdalıeva qoıylymnyń joǵary deńgeıle ótkenin atap ótip, aq halatty abzal jandardyń eńbegin erekshe baǵalap, qurmetpen qaraǵan teatr ujymyna alǵysyn bildirdi.
«Abaı-Toǵjan» mýzykalyq dramasy – qazaqtyń uly aqyny Abaı Qunanbaıulynyń bozbala kezinen kórinis berip, alǵashqy mahabbatyn sıpattaıtyn sahnalyq týyndy. Spektakldiń ınssenırovka avtory Mıras Ábil, rejısseri Qazaqstannyń eńbek sińirgen qaıratkeri Ashat Maemırov, qoıýshy-rejısseri Alma Syrbaeva, kompozıtory Baýyrjan Aqtaev, baletmeısteri Shyryn Mustafına, hormeısteri Ǵalymjan Berekeshev.
