Prezıdentke mədenıet, sport, týrızm, arhıv, kınematografııa salalarynda atqarylǵan jumystar týraly esep berildi. Sonymen qatar bıyl ótetin Táýelsizdiktiń 30 jyldyǵy, jyr alyby Jambyl Jabaevtyń 175 jyldyǵy, kúsh atasy Qajymuqan Muńaıtpasulynyń 150 jyldyǵyn jáne ózge de ataýly mereıtoılyq datalardy atap ótýge baılanysty jasalatyn jumystardyń jaıy baıandaldy.
Qasym-Jomart Toqaevqa Shəken Aımanov atyndaǵy «Qazaqfılm» stýdııasy men Ulttyq kınony qoldaý memlekettik ortalyǵynyń jumysy, «Kınematografııa týraly» Zańǵa engiziletin tolyqtyrýlar jóninde aıtyldy.
Mádenıet jáne sport mınıstri Memleket basshysyna Tokıo Olımpıadasyna daıyndyq jumysy, balalar men jasóspirimderge arnalǵan shyǵarmashylyq úıirmeler men sport seksııalaryna jan basyna shaqqandaǵy qarjylandyrý júıesin engizý boıynsha məlimet berdi.
Aqtoty Raıymqulova pandemııa kezinde ishki týrızmge suranystyń arta túskenin jetkizdi. Salany yntalandyrýdyń tıimdi tetikteriniń biri – balalardyń demalys oryndaryna ushaqpen barýyn sýbsıdııalaý ekenin, osyǵan qatysty tıisti túzetý «Týrızm qyzmeti týraly» Zań jobasyna engizilip, respýblıkalyq bıýdjettik komıssııa tarapynan qoldaý tapqanyn atap ótti.
Kezdesý sońynda Qasym-Jomart Toqaev Aqtoty Raıymqulovaǵa ıdeologııalyq, tárbıelik mańyzy zor jumystardy, «Rýhanı jańǵyrý» baǵdarlamasyn, sıfrlandyrý boıynsha qolǵa alynǵan bastamalardy sapaly jalǵastyrý, mınıstrliktiń onlaın jobalaryn jandandyrý jóninde tapsyrma berdi.
