2019 jylǵy 27 jeltoqsandaǵy Bek Air kompanııasy ushaǵynyń apatynan bılik bir sabaq alýǵa tıis edi. Bek Air áýekompanııasyna qarasty Fokker 100 ushaǵynyń Almaty áýejaıynan kóterile bere, ushý-qoný jolaǵynan shyǵyp ketip, turǵyn úıge soǵyla qulaýy saldarynan 15 adam qaza tapty, 49 adam jaraqat aldy. Osyǵan oraı el Prezıdenti 28 jeltoqsandy «Ulttyq aza tutý kúni» dep jarııalady.
Sodan bılik únsiz qalǵan-tyn. Memlekettiń sol apattan qandaı sabaq alǵany qazir ǵana belgili bolyp otyr. Indýstrııa jáne ınfraqurylymdyq damý mınıstrligi «QR keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyn jarııa etti.
Bir jyldan asa ýaqyt ishinde biraz bylyq anyqtaldy. Ákimder barlyq derlik áýejaı aınalasyndaǵy jerlerdi úlestirip berip, áýejaılardyń órkendeýine óris qaldyrmapty. Bul jer telimderiniń jańa qojaıyndary ol jerdi Úkimetke qymbatqa ótkizip, paıda tabýy úshin jasalsa kerek.
«Almaty, Shymkent, Aqtóbe, Nur-Sultan jáne basqa da kóptegen qala áýejaılary problemaǵa tap boldy, olardyń aınalasyndaǵy aýmaq turǵyn úı qoryna, aýyl sharýashylyǵyna jáne ózge de maqsattarǵa taratyp berilgen. Saldarynan áýejaılardyń ınfraqurylymyn odan ary damytý úshin qajetti jer joq. Sonyń kesirinen, ushý qaýipsizdigine qater týyndaýda. Buǵan 2019 jylǵy jeltoqsandaǵy Bek Air ushaǵynyń apaty dálel», dedi mınıstrlik.
