Tek saqtyq sharalary men araqashyqtyq eskerilip, syıymdylyǵy 100 adamnan aspaıtyn meshitterdiń ishi 25-30 paıyz ǵana tolýy shart.
Bul týraly óńirlik kommýnıkasııalar qyzmetinde ótken brıfıngte oblystyń bas ımamy Erkebulan Qaraqulov málimdedi.
Eń mańyzdysy, namaz oqıtyn ǵımaratty zalalsyzdandyrý sharalaryn júrgizý qajet.
Sondaı-aq, paryz namazynyń ótelýinen keıin kóp uzamaı meshitti bosatý lázim.
Oblystyq, qalalyq deńgeıdegi jáne aýdan ortalyqtaryndaǵy meshitterde juma namazyn oqýǵa ruqsat berilmeıdi.
Aldaǵy ýaqytta epıdemııalyq ahýal turaqty bolǵan jaǵdaıda qosymsha ózgerister engizilýi múmkin.
«Qazaqstan musylmandary dinı basqarmasyna 30 jyl tolýyna oraı, byltyr Bas múftı Naýryzbaı qajy Taǵanulynyń tóraǵalyǵymen IV respýblıkalyq ımamdar forýmy ótti. Alqaly jıynda «Zııatker ımam», «Zırat salý, zııarat ádebi», «Dastarqan jaıý ádebi» syndy mańyzdy qujattar qabyldanǵan. Sonyń negizinde oblysta jospar túzilip, tıisti jumystar atqarylýda. Túrkistan oblysynda jalpy 750 meshit bar. Ǵıbadat úılerinde 1 myńǵa jýyq din ókilderi turǵyndardyń dinı saýatyn arttyrýǵa úles qosyp keledi», dedi ol.
Jýyrda ǵana Túrkistan oblysynyń bas ımamy qyzmetine kirisken Erkebulan Ybraıymuly óńir jurtshylyǵyn pandemııany báseńdetýge yqpal jasaý qajettigin atap ótti.
Onyń sózinshe, qaza aýyr bolǵanymen sabyr qylyp, janaza rásiminen soń as berýdi ýaqytsha doǵara turǵan jón.
