Qazaqstan • 09 Aqpan, 2021

Qazaqstannyń 276 eldi mekenin sý basý qaýpi bar

56 ret kórsetildi

Tótenshe jaǵdaılar mınıstrligi ortalyq jáne jergilikti atqarýshy organdarmen birlesip, kóktemgi sý tasqyny kezeńinde tótenshe jaǵdaılardyń týyndaý qaýpin azaıtý jónindegi is-sharalar keshenin júrgizýde. О́tken jyldardyń tájirıbesin eskere otyryp, sý basý qaýpi bar núkteler aıqyndaldy. Bul týraly Ortalyq kommýnıkasııalar qyzmetinde ótken brıfıngte Tótenshe jaǵdaılar birinshi vıse-mınıstri Ibragım Kúlshimbaev habarlady.

Onyń aıtýynsha, sý tasqyny qaýpiniń aldyn alý jáne joıý boıynsha Jol kartasynyń áreket etý kezeńinde 2017 jyldan bastap sý tasqynyna qarsy 402 is-shara oryndaldy.

«Kóktemgi sý tasqynyna asa beıim 905 eldi meken anyqtaldy. Jol kartasynyń is-sharalaryn oryndaý 315 eldi mekendi sý basý qaterin tolyǵymen joıýǵa jáne 314 eldi mekende bolatyn qaterdi barynsha azaıtýǵa múmkindik berdi. Tórt jyl ishinde ınjenerlik qorǵaý boıynsha 400-den astam is-shara oryndaldy, onyń ishinde qorǵanys bógetteri men bilikterin salý, qorǵanys qurylystaryn jóndeý, jaǵalaýdy bekitý, túbin tereńdetý boıynsha jumystar júrgizý, avtojoldarda jańa ótkizý qubyrlaryn salý, avtomobıl kópirlerin rekonstrýksııalaý jáne salý. Sonymen qatar, 276 eldi mekendi sý basý qaýpi saqtalýda. Osyǵan baılanysty, ótken jyldyń sońynda mınıstrliktiń bastamasymen múddeli memlekettik jáne jergilikti atqarýshy organdarmen birlesip, 2023 jylǵa deıingi jańa Jol kartasy bekitildi», - dep habarlady vedomstvo ókili.

Sonymen qatar, jergilikti jerlerde 145 myń tonna ınertti materıaldar, 780 myń dana qap, shamamen 3 myń tonna JJM jáne 20 tonnadan astam jarylǵysh zattar qory daıyndaldy. Zardap shekkenderdi ýaqytsha ornalastyrýdyń 3 myńnan astam pýnkti, lagerler ornalastyrý jáne úı janýarlaryn aıdap áketý úshin qaýipsiz oryndar anyqtaldy. Evakýasııalaý baǵyttary jańartylyp, qajetti kólik esepteldi.

Sońǵy jańalyqtar

Shırek fınalǵa ótti

Tennıs • Keshe

Uqsas jańalyqtar