Atalǵan mýzeı dırektorynyń orynbasary Dáýren Júsipov kóne taǵamdar halyq murasy bolǵandyqtan, eskiden kele jatqan resepter týraly maǵlumattardy tereńdetýdiń mańyzdy sharýa ekenin aıtady.
– Joba ıdeıasyna bizdiń elordalyq áriptesimiz, Ulttyq mýzeı janyndaǵy «Halyq qazynasy» ǵylymı-zertteý ınstıtýtynyń materıaldyq emes mádenı mura bóliminiń basshysy Áıgerim Musaǵajınovanyń eńbegi ıgi yqpalyn tıgizdi. Ol óziniń ǵylymı eńbekterinde qazaq resepteriniń 200-den astam umytylǵan túrin jınap, aımaqtarǵa, sonyń ishinde Osakarov jáne Qarqaraly aýdandaryna ekspedısııalar uıymdastyrdy, – deıdi ol.
Murajaı qyzmetkerleri kóne resept negizinde qazaqtyń ulttyq taǵamynyń biri ásipti ázirleýdi jańǵyrtty. Negizinde bul taǵamdy ázirleýdiń birneshe ádisi bar eken jáne ol aımaqtarda ártúrli atalatyn kórinedi. Keıbir jerde ony shujyq dep te ataıdy. Ádette bul taǵam qoı soıylǵan kúni daıyndalady. Aldymen maldyń ishegi aınaldyrylyp, ol muqııat jýylyp, tazartylady. Et pen baýyr et tartqyshtan ótip, dámdeýishter qosylǵannan keıin, oǵan tartylǵan kúrish salynady. Sodan keıin az mólsherde sý quıylyp, ónim muqııat aralastyrylady. Daıyndalǵan taǵam ishekke toltyrylady da, eki jaǵynan túıilip baılanady. Aýa shyǵarý úshin ásip birneshe jerden ınemen tesiledi eken. Sonan soń ony sý quıylǵan qazanǵa salyp, 50-60 mınýttaı qaınatady. Dastarhan basynda ásipti japyraqtap týrap, ystyq nemese salqyndatylǵan kúıinde beredi.
Tarıhı-ólketaný murajaıynyń qyzmetkeri Narsha Erkinqyzy ár aıdyń sońynda kóne resept negizinde «tirilgen» taǵamdar boıynsha beıne rolık túsirýdi josparlap otyrǵandaryn aıtady. Budan bólek, aldaǵy Naýryz meıramynda «Atadan qalǵan adal as» jobasy aıasynda merekelik taǵamdardy tanystyrý is-sharasy da josparda bar eken.
Qaraǵandy oblysy
