«Qurylystyń qarqynyn eskere otyryp, sonymen qatar, nóser kanalızasııasynyń júıesimen de ýaqtyly aınalysyp otyrý qajet. Qaladaǵy problemaly oryndardyń biri - B.Momyshuly ýchaskesi. Onda nóser kanalızasııasynyń magıstraldi kollektorynyń qurylysyn aıaqtaımyz. Atalǵan nóser kanalızasııasynyń uzyndy 500 metrdi quraıdy – basy Daýylpaz kóshesinen Elim-aı kóshesine deıin (B.Momyshuly dańǵylyn basyp ótedi). Bul qoldanystaǵy nóser kanalızasııasy jelisiniń ótkizý qýatyn bir jarym esege arttyrýǵa múmkindik beredi.
Sondaı-aq «Jastar» yqsham aýdanyndaǵy (Táshenov pen Amman kósheleriniń qıylysy) kollektorlarǵa rekonstrýksııa jasap, tazartý qurylysyn júrgizemiz. Buryn bul jer batpaqty bolǵan. Mundaǵy tazartý qondyrǵysy jaýyn-shashyn sýyn Esil ózenine tazartyp quıýǵa múmkindik beredi. Buǵan deıin qaldyq sý ózenge sol kúıi quıylyp, aǵyndy sýdy laılap, qala ekologııasyna da keri áserin tıgizgen. Qurylysty bıyl aıaqtaýdy josparlap otyrmyz. Alaıda sýdy tazalaýdyń birinshi kezeńin ótken jyldyń kúzinde iske qosqan bolatynbyz», - dedi elorda ákimi Altaı Kólginov.
«Jastar» yqsham aýdanyndaǵy jańa tazartý qondyrǵysy qýaty táýligine 42 myń tekshe metrden asady. Bul tazartý qondyrǵysy Táshenov, Baraev, Ýálıhanov, Imanbaeva kósheleri men Respýblıka dańǵylyn sý basýdan qorǵaýǵa múmkindik beredi. Bul tazartý qondyrǵysy jerasty bolǵandyqtan, onyń ústińgi jaǵynda abattandyrylǵan gúl baǵyn ornalastyrý, kógaldandyrý qarastyrylǵan.
Sondaı-aq elorda ákimi Altaı Kólginov «Telman» turǵyn alabyndaǵy magıstraldi kollektor men tazartý qondyrǵysy jumystarynyń aıaqtalǵanyn atap ótti. Onyń qýaty táýligine 36 myń tekshe metrdi quraıdy. Bul jobany júzege asyrý «Telman» turǵyn alaby men № 27 kóshe boıyndaǵy jáne basqa da qurylysy qarqyndy júrip jatqan aýmaqty sý basýdan qorǵaýǵa múmkindik beredi.
Budan bólek 2020 jyly tazartý qurylystary «Prıgorodnyı» turǵyn alaby men Alash tas jolynyń boıyndaǵy logıstıkalyq aýdanynda da júrgizildi. 2019 jyly «Myńjyldyq» alleıasy aýmaǵyndaǵy eki ýchaskede nóser kanalızasııasynyń máselesi sheshildi.
Nóser kanalızasııasynyń júıesi toqtaýsyz jumys isteýi úshin kollektorlardy únemi tazartý jumystary da júrgizilýde. Táshenov kóshesiniń boıynan 30 tonna, aryqtar men qudyqtan 2,5 myń tonna qoqys shyǵaryldy. Budan bólek, nóser kanalızasııalaryna zańsyz qoqys tastaýdy tekserý boıynsha reıdter de júrgizilip turady.
