«Qolda 2.0» shuǵyl kómek baǵdarlamasy aıasynda «Zań talaby» quqyq qorǵaý ortalyǵy» qoǵamdyq birlestigi uıymdastyrǵan trenıngterge 50 qyz-kelinshek qatysty. Qatysýshylardyń deni Túrkistan, Arys, Shardara, Saryaǵash, Jetisaı, Túlkibas, Saıram, Tóle bı, Maqtaaral aýdandary syndy shalǵaı óńirdiń turǵyndary.
«Qazir ajyrasý prosesi júrip jatyr. Sondyqtan maǵan sot keńsesiniń platformasyn paıdalanýdy úırený kerek boldy. Onlaın trenıng týraly Túrkistan qalasy ákimdiginiń qyzmetkerinen bildim. Qosymsha arqyly polısııaǵa aryz berýdi, sondaı-aq ózimniń negizgi quqyqtarymdy jáne turmystyq zorlyq-zombylyq jasaǵandardy qandaı jaza kútetini týraly bildim. Trenıng óte qyzyq boldy, genderlik máselelermen qatar, praktıkalyq jattyǵýlar men teorııany úılestire otyryp mańyzdy taqyryptar qozǵaldy», deıdi Túrkistan qalasynyń turǵyny E.Kemelbekova.
«Qolda 2.0» shuǵyl kómek baǵdarlamasy bastalǵannan beri «Zań talaby» quqyq qorǵaý ortalyǵy» qoǵamdyq birlestiginiń advokatyna fızıkalyq, jynystyq zorlyq-zombylyq boıynsha habarlasyp jatqandardyń sany artqan.
«Turmystyq zorlyq-zombylyq qurbandaryna quqyqtyq jáne psıhologııalyq kómek kórsetiledi. Qoǵamdyq birlestik psıhologteri zorlyq kórgenderge psıhoemosıonaldy jaǵdaıyn túzetý boıynsha keńes berip, art-terapııa ótkizedi. Byltyrdan beri habarlasyp jatqan fızıkalyq jáne jynystyq zorlyq-zombylyq qurbandarynyń jasy 14-ten 48 jasqa deıin, arasynda kámeletke tolmaǵan balalar da bar. Trenıngterde genderlik quqyqtar, sıfrly quqyqtar jáne onyń róli jaıynda aıtyldy», deıdi «Zań talaby» quqyq qorǵaý ortalyǵy» qoǵamdyq birlestiginiń tóraǵasy Mýrad Iýnýsov.
Joba aıasynda Shymkent qalasy jáne Túrkistan oblysy boıynsha tegin quqyqtyq jáne psıhologııalyq kómek kórsetý, turmystyq zorlyq-zombylyq qurbandary úshin senim telefony men onlaın-chattyń jumysyn jolǵa qoıý, #StopViolence uranymen aqparattyq naýqan ótkizý, jastar men aýyl-aımaqtarda turatyn áıelderge arnalǵan sıfrly bilim berý jáne genderlik teńdik boıynsha onlaın trenıngter uıymdastyrý, áıelderge zorlyq-zombylyq kórsetken er adamdarǵa áreketti qaıtalamaý maqsatynda jumystar ótkizý josparlanyp otyr. Aldaǵy trenıngter sheńberinde genderlik quqyqtar jáne teńdik, áıelderge memlekettik deńgeıde quqyqtyq qorǵaý kórsetý, zorlyq-zombylyqtyń túrleri, turmystyq zorlyq-zombylyq qurbandaryna arnalǵan is-qımyl algorıtmi, áıelderdiń quqyqtaryn qorǵaýdy kúsheıtý úshin ınternetti paıdalaný taqyryptary qamtylady.
Al #StopViolence kampanııasy joba aıaqtalǵanǵa deıin, ıaǵnı osy jyldyń sáýir aıyna deıin jalǵasady. «Aldaǵy eki aıda Túrkistan oblysyndaǵy 7 aýdanǵa 21 sapar josparlanǵan (Arys qalasy, Túrkistan qalasy, Shardara, Saryaǵash, Maqtaaral, Jetisaı, Saıram aýdandary). #StopViolence kampanııasy aıasynda áıelder men qyzdarǵa olardyń quqyqtaryn túsindirip otyramyz. Sonymen qatar áıelderge «Eger siz otbasylyq zorlyq-zombylyq qurbany bolsańyz, ne isteýińiz kerek?» atty aqparattyq materıaldardy, al er adamdarǵa «Ashýmen qalaı kúresýge bolady?» degen broshıýralardy taratamyz», deıdi atalǵan birlestiktiń tóraǵasy Mýrad Iýnýsov.
