Qalam ustaǵan qaýymǵa qurmet qashanda joǵary. Sonyń bir kórinisi keshe elordada ENRC (Eýrazııalyq tabıǵı resýrstar korporasııasy) men qazaq baspasóziniń qarashańyraǵy «Egemen Qazaqstan» gazeti osymen tórtinshi ret ótkizip otyrǵan dástúrli respýblıkalyq «Altyn qalam» shyǵarmashylyq baıqaýynyń qorytyndysy jarııalanyp, onda ónerkásip taqyrybyna jazatyn úzdik jýrnalıster marapattaldy.
Qalam ustaǵan qaýymǵa qurmet qashanda joǵary. Sonyń bir kórinisi keshe elordada ENRC (Eýrazııalyq tabıǵı resýrstar korporasııasy) men qazaq baspasóziniń qarashańyraǵy «Egemen Qazaqstan» gazeti osymen tórtinshi ret ótkizip otyrǵan dástúrli respýblıkalyq «Altyn qalam» shyǵarmashylyq baıqaýynyń qorytyndysy jarııalanyp, onda ónerkásip taqyrybyna jazatyn úzdik jýrnalıster marapattaldy.
Atalmysh sharaǵa Parlament depýtattary Jabal Erǵalıev pen Aldan Smaıyl, «Egemen Qazaqstan» RG» AQ prezıdenti Saýytbek Abdrahmanov, «ENRC Kazakhstan» AQ kommýnıkasııalar boıynsha vıse-prezıdenti Nadejda Shashkova jáne «Qazaqstan elektrolız zaýyty» AQ vıse-prezıdenti Jumabek Hamzın qatysty.
«Bizdiń kompanııa qazaq tildi buqaralyq aqparat quraldarymen jyl saıyn áriptestikti jalǵastyra bermek. «Altyn qalam» baıqaýy bul áriptestikti ary qaraı damytyp, jýrnalıster sheberligin shyńdaıdy dep senemiz. Biz Memleket basshysy Nursultan Nazarbaevtyń memlekettik tildi qoldaý men damytý salasyndaǵy saıasatyna óz úlesimizdi qosatyndyǵymyzdy maqtan tutamyz», – dedi ENRC Kazakhstan kommýnıkasııalar boıynsha vıse-prezıdenti Nadejda Shashkova. Sondaı-aq, ol jyldan-jylǵa qanatyn qataıtyp kele jatqan baıqaýda eki márte qatarynan laýreat atanǵan jýrnalıster de bar ekenin jáne jyldan-jylǵa konkýrsqa keletin materıaldardyń sany ǵana emes, sapasy da arta túskendigin nazardan tys qaldyrmady.
«Jaqynda Elbasy táýelsiz Qazaqstannyń jeti qazynasyn atap-atap berdi. Sonyń tórtinshi qazynasy – ındýstrııalyq-ınnovasııalyq ekonomıka. «Egemen Qazaqstan» gazetiniń búgingi sanynda akademık Kenjeǵalı Saǵadıevtiń osy tórtinshi qazyna týraly maqalasy shyqty. Osy maqala shyqqan kúni biz tórtinshi ret «Altyn qalam» konkýrsynyń qorytyndysyn shyǵaryp otyrmyz. Atalǵan ıdeıany barlyq turǵydan qoldaǵany úshin ENRC Kazakhstan kompanııasyna razylyǵymyzdy bildiremiz. Bul konkýrs arqyly qazaq jýrnalıstıkasynda óndiris taqyryby, ónerkásiptiń problemalary burynǵydan áldeqaıda bilikti, saýatty, tereń, kásibı turǵydan jazyla bastady dep oılaımyn. Aldaǵy ýaqytta da ıgi áriptestigimiz jalǵasa beredi dep sengimiz keledi», dedi laýreattardy marapattaý aldynda sóz alǵan «Egemen Qazaqstan» RG» AQ prezıdenti Saýytbek Abdrahmanov.
Bıylǵy jyly baıqaýǵa «Egemen Qazaqstan», «Aıqyn», «Aqtóbe» «Munaıly astana», «Ońtústik Qazaqstan», «Ortalyq Qazaqstan», «Soltústik Qazaqstan», «Saryarqa samaly», «Aqsý joly» syndy respýblıkalyq jáne óńirlik gazetterdiń, sonymen birge «Qazaqstan-Qaraǵandy», «Irbıs» telearnalarynyń 20 jýrnalısi qatysyp, 6 jýrnalıst baıqaý laýreattary atandy.
Sonymen, baıqaý qorytyndysy boıynsha birinshi oryn dıplomy men 500 myń teńge aqshalaı syılyqqa áriptesimiz, respýblıkalyq «Egemen Qazaqstan» gazetiniń Qaraǵandy oblysyndaǵy menshikti tilshisi Aıqyn Nesipbaı ıe boldy. Ol Qaraǵandy oblysyndaǵy Shubarkól kenishindegi óndiristik jetistikter jaıyndaǵy maqalalary úshin marapattalyp otyr. Al ekinshi oryn – ekeý. Ol oryndar Aqtóbe oblysyndaǵy «Kazhrom» kompanııasynyń jumysy týraly turaqty jazyp júretin «Aqtóbe» gazetiniń menshikti tilshisi Amanqos Orynǵalıev pen elimizdegi tústi metallýrgııanyń damýy jaıynda «Altyntaý» kompanııasynyń zaýyttary týraly maqalalary úshin «Aıqyn» gazetiniń Astana qalasyndaǵy menshikti tilshisi Qanat Mahambetke berildi. Júldegerler 400 myń teńge syılyqty enshiledi.
Úshinshi orynnyń úsh júldesi 300 myń teńgelik aqshalaı syılyqtarmen qosa Pavlodar oblysyndaǵy óndiristik kásiporyndardyń ekologııalyq bastamalary týraly baǵdarlamalary úshin «Irbıs» telearnasynyń jýrnalısi Zúlfıra Maǵzumovaǵa, temirjol logıstıkasy jetistikteri haqynda «Egemen Qazaqstan», «Alash aınasy» syndy respýblıkalyq basylymdarda qalam terbegen jýrnalıst Eskendir Ertaıǵa jáne Qaraǵandy oblysyndaǵy «Borýsan-Makına» kompanııasyna tıesili taý-ken óndirisinde paıdalanatyn kólikterdi qaıta qalpyna keltirý sehynyń jumysy jónindegi telebaǵdarlamasy úshin «Qazaqstan-Qaraǵandy» telearnasynyń redaktory Álı Toıjigitovke tapsyryldy.
Qalamyn janyna serik etken tilshi jurtynyń shabytyna shabyt qosatyn «Altyn qalam» konkýrsy jalǵasyn tabady. Oǵan qazaq tildi respýblıkalyq, óńirlik jáne vedomstvolyq BAQ-tardyń ónerkásip taqyrybyna jazatyn jýrnalısteri qatysa alady.
Rásim sońynda «Egemen Qazaqstan» gazetiniń basshysy Saýytbek Abdrahmanov ENRC Kazakhstan kompanııasyna «Etjeńdi «Egemen Qazaqstan» – 2012» kitabyn shaǵarýǵa da demeýshilik jasaǵany úshin alǵys aıtty. Ol kitap keshe konkýrs júldegerlerine tartý retinde berildi.
Ábdirahman QYDYRBEK,
«Egemen Qazaqstan».
ASTANA.
Sýretterdi túsirgen Erlan OMAROV.
