Ibragım Aqjoluly medısına ǵylymdarynyń doktory, professor, joǵary sanatty hırýrg, onkolog, balalar hırýrgi. «Qazaqstan Respýblıkasy densaýlyq isiniń úzdigi», «Altyn dáriger», «Eren eńbegi úshin» medaldarynyń ıegeri.
Kásibine adaldyq tanytqan abzal jan 36 jyldan beri adam densaýlyǵynyń saqshysy qyzmetin abyroımen atqaryp júr. I. Tashev 2018 jyldyń shilde aıynan beri qalalyq densaýlyq saqtaý basqarmasynyń №3-shi qalalyq aýrýhananyń basshylyǵyna kelip, ujymnyń qyzmetin respýblıkalyq deńgeıge jetkizý baǵytynda jemisti qyzmet etip keledi.
Bedeldi hırýrg búginge deıin 13 000-ǵa jýyq kúrdeli operasııa jasaǵan. Bilikti maman respýblıkalyq medısına ortalyǵynda aýyr haldegi naýqastarǵa ota jasap, oń nátıjelerge qol jetkizgen. Tipti birneshe ret shet eldik áriptesterimen birge aǵza almastyrý otalaryn jasap, elimizdiń hırýrgııalyq kómek kórsetý deńgeıin álemdik dárejege kóterýde súbeli eńbek etýde.
Ibragım Tashevtiń ǵalym retinde 120-dan astam ǵylymı-tájirıbelik eńbekteri jáne 10-ǵa jýyq stýdentter men dárigerlerge arnalǵan ádistemelik quraldary jaryq kórgen. 20-dan astam jańalyqtar men ónertapqyshtyq patentterdiń avtory.
