«Jolaýshylar tasymaly» jańa qyzmetiniń múmkindikteri

– Kóbine jolaýshylar bıletterdi satyp alý kezinde tikeleı baǵyttaǵy marshrýtty tań­daıdy («Nur-Sultan – Almaty», «Aqtaý – Almaty» jáne t.b.), al qaýyrt tasymal kezinde mejeli jerge deıin bıletterdi satyp alý múmkindikterine ıe bolmaı jatqan shaqtary bar. Endi jańa qyzmetti engizý arqyly bılet kassıri jolaýshyǵa bir nemese birneshe poıyz aıasynda qajetti marshrýtty tańdaýǵa kómektese alady. Bul rette temir jol bıletterin rásimdeý, aýysyp otyrý pýnktterinde kelisilgen poıyzdardyń kelýi men jóneltilýi arasyndaǵy keminde 1 (bir) saǵat aıyrmasyn eskere otyryp júzege asyrylady, – dedi «Jolaýshylar tasymaly» AQ Bas dırektorynyń Marketıng jáne satý jónindegi orynbasary Vıktor Boshmann.

– Qajetti oryn bolmaǵan jaǵdaıda jolaý­shy óziniń júrip-turýy úshin qandaı da bir marshrýtty tańdaýǵa quqyly. Mysaly, Nur-Sultannan Almatyǵa deıin ol birinshi bıletti Qaraǵandyǵa deıin, al ekinshisin Qaraǵandydan Almatyǵa deıin ala alady. Mysaly, Nur-Sultannan Shymkentke deıin aýysyp otyrý múmkindigi bolǵan jaǵdaıda, jolaýshy Shý qalasyna deıin bılet satyp ala alady, al Shý qalasynan basqa poıyzben Shymkentke bara alady, – dep naqtylady «Nurly jol» temir jol vokzalynyń bılet kassasy meńgerýshisiniń min­detin atqarýshy Almagúl Ysqaqova.

Eske sala keteıik, temir jol bıletterin satý poıyzdyń jóneltilýine 45 táýlik qalǵanda ashylyp, poıyzdyń jóneltilýine 10 mınýt qalǵanda jabylady. Sondaı-aq balama tańdaý múmkindigi joq jolaýshylarǵa bos oryn bolmaǵan jaǵdaıda «Kútý paraǵy» qyzmeti qoljetimdi bolady. Byltyr atalǵan qyzmetti 65 400 myńnan astam jolaýshy paıdalanǵan.

Jol júrý qujattaryn (bıletterdi) qaıtarý bıletterdi satyp alý tásili men ornyna (qolma-qol nemese qolma-qol aqshasyz esep aıyrysý) baılanysty jolaýshylardy, bagajdy, júk-bagajdy jáne poshta jóneltilimderin temir jol kóligimen tasymaldaý qaǵıdalaryna sáıkes júrgiziledi.

Koronavırýs pandemııasyna baılanysty jolaýshylardan jol boıynda ózimen birge jeke qorǵanysh quraldaryn alyp júrýdi jáne sanıtarlyq-epıdemııalyq talaptardy saqtaýdy suraımyz, deıdi «Jolaýshylar tasymaly» AQ baspasóz qyzmeti.

«Egemen-aqparat»