«ASSYL DOMBYRA» dep aıdar taqqan aıshyqty alaman tórt kezeńge sozylmaq. Jyldar jylnamasynda tól ónerimizdi tórge súırep kele jatqan Aıtys aqyndary men jyrshy-termeshiler Odaǵynyń tóraǵasy Júrsin Ermannyń 70 jyldyq mereıtoıyn arqaý etken alǵashqy topta aýzymen qus tistegen 16 aqyn óner kórsetti. Alaman dodanyń ekinshi toby sáýir aıynyń 10 juldyzynda, úshinshi top maýsymnyń 5-de Aqsýatta aıtysady dep josparlanǵan. Osylaısha barlyq úsh kezeńniń qorytyndysy boıynsha saıdyń tasyndaı iriktelip shyqqan 24 aqyn qyrkúıek aıynda fınaldyq kezeńde baq synamaq. «ASSYLTAS» qoǵamdyq qory demeýshilik etken aıtysty eldegi epıdemııalyq jaǵdaıǵa baılanysty kórermen qaýym ASSYLTAS TV youtube arnasynan tikeleı efırde tamashalady.
Asanáli Áshimov, Ásııa Berkenova, Áselhan Qalybekova, Svetqalı Nurjanov, Qoılybaı Asanov, Serik Qusanbaev, Ánýar Omar, Amanjol Áltaev, Serik Qalıev, Dáýletkereı Kápuly syndy óner maıtalmandary men aqyndar qazylyq etken sóz barymtasynda ulttyq qundylyqtar ulyqtalyp, qoǵamdaǵy ózekti máseleler qaýzaldy.Aıtys dese arqasy qozatyn kóptiń kóńilin, shóptiń shólin qandyrǵan aq jańbyrsha jadyratqan jyr dodasynda 8 jup óner kórsetti. «ASSYL DOMBYRA» aıtysynyń talabyna saı jeńiske jetken segiz aqyn qyrkúıektegi aqtyq dodaǵa joldama alýy tıis edi, degenmen sóz barymtasynda bir-birine des bermegen Pavlodarlyq Aspanbek Shuǵataev pen Oraldyq Jansaıa Mýsına qazylar alqasynyń sheshimimen fınalǵa qatar ótti. Toptan ozǵan toǵyz aqynnyń qatarynda Meıirbek Sultanhan (Qyzylorda), Shalqarbaı Izbasarov (Atyraý), Rústem Qaıyrtaıuly (Almaty), Aıtbek Tursynbaev (Taraz), Tólegen Jamanov (Qaraǵandy), Erjan Ámirov (Qyzylorda), Aıbek Jeńisqazınder (ShQO) bar.
Jyr alamanyna qatysqan barlyq 16 aqynǵa demeýshiler taǵaıyndaǵan 150 myń teńge kólemindegi qarjylaı syıaqy men dombyra tabystaldy. Basty syılyq – asyl tastarmen kómkerilgen dombyranyń ıesi endi eki toptaǵy aqyndar aıtysy ótkennen keıin qyrkúıekte shymyldyǵyn túretin aqtyq synda anyqtalmaq.
– Jórgeginde jyr qasıetin emip, «sóz qudiretin óz qudiretim» dep tanyǵan qazaq úshin ultymyzdyń uly murasyna balanatyn aıtys óneriniń orny bólek. Sondyqtan bolar, sulý sózge sýsap kelgen tyńdarmandy súmbile jyrdyń sýatyna súıreı jóneletin aıtysymyzdyń básiresi sátke de bolsa bıikten qulap kórgen emes. Almaty azattyqtyń altyn besigi ǵana emes, sulý jyrdyń saltanat qurǵan aıaýly shahary. Ult ónerin qoldaý bárimizge ortaq borysh, – deıdi Qazaqstannyń Eńbek eri Asanáli Áshimov.
ALMATY
