Olardyń esepteýinshe, Qazaqstanda kólemi 90 sharshy metr bolatyn, 20 jylǵa ıpotekaǵa beriletin páter nemese úı satyp alý kezindegi aı saıynǵy tólem bir otbasynyń aı saıynǵy tabysynan 1,5 ese asyp túsken. Eń qoljetimdi ıpoteka – Saýd Arabııasy, AQSh, Pýerto-Rıko elderinde eken. Bul elderdegi ıpotekanyń aı saıynǵy tólemi bir otbasynyń aılyq tabysynyń 30 paıyzyn ǵana quraǵan.
О́zimiz jıi salystyratyn EAEO elderiniń ishindegi úzdik kórsetkish Reseıge tıesili – 65-oryn. Alaıda ondaǵy aı saıynǵy tólem bir otbasynyń kirisinen 30,3 paıyzǵa kóp. Armenııa 93, Belarýs 96, Qyrǵyzstan 98-orynda. Bul elderdegi ıpoteka aılyq tólemi bir otbasy aılyq tabysynan sáıkesinshe 2,3, 2,5 jáne 2,6 ese joǵary. Reıtıngti Argentına qorytyndylaıdy: aı saıynǵy tólem bir otbasynyń bir aıda jıyp-tergen tabysynan 9,4 ese joǵary eken. Iran (108), Sırııa (107) elderiniń de jaǵdaıy máz emes.
Qazaqstan byltyrmen salystyrǵanda jaǵdaıyn birshama jaqsartqan. 2020 jyly bizdiń el 104 eldiń ishinen 80-oryn alyp, aılyq tólem otbasynyń aılyq tabysynan 77 paıyzǵa asyp ketken. Al bes jyl buryn 78-orynda bolyppyz.
Elimizde zeınetaqy qorynan turǵyn úı jaǵdaıyn jaqsartý maqsatynda qarjy alý bastamasy baspana baǵasynyń qymbattap ketýine ákelip soqty. Bir jyl ishinde 1 sharshy metr jańa úı baǵasy 8,2 paıyzǵa ósip, 319,3 myń teńge bolǵan. Bul sońǵy bes jyldaǵy eń joǵary kórsetkish. Ekinshi naryqtaǵy úıdiń bir sharshy metri sońǵy jylda 20,5 paıyzǵa sharyqtap, 244,7 myń teńge bolǵan. Tek bıyl qańtar aıynyń ózinde jańa úılerdegi 1 sharshy metr quny 3,8 paıyzǵa, ekinshi naryqta 7,2 paıyzǵa qymbattaǵan.
Telegramdaǵy Risk Takers kanalynyń avtory eldegi baspana baǵasynyń yrshyp ketýine memlekettiń ózi kináli dep sanaıdy. Jaqynda Rossııa Bank tóraǵasy Elvıra Nabıýllına eldegi usynys suranysqa ilese almaı, bul baspana baǵasynyń qymbattaýyna yqpal etkenin aıtqan. Osyny negiz etken kanal avtory RF úkimetiniń áreketi úı baǵasyn ósirip jiberdi, bizdiń ahýal da osyǵan uqsas deıdi.
«Zeınetaqy qarjysyn paıdalaný ásirese, arendalyq turǵyn úı men ekinshi naryqtaǵy úı baǵasynyń ósýine áser etti. Reseı suranysty yntalandyrǵan jaǵymsyz áserdi túsinip jatsa, Qazaqstanda sheneýnikter men múddeli taraptar ázirge óz pozısııasyn qorǵap áýre. Resmı tulǵalar spekýlıasııa jasady dep satýshylardy aıyptaıdy nemese basqa sebepter izdeıdi. Onyń ústine negatıv aqparatty azaıtý úshin pıar mamandardy jaldaýdan da taıynbaıdy. Olar benefısıarlar bankter men qurylys kompanııalary ekenin umytyp ta ketedi. Qazir tek aqsha alǵandar týraly ǵana aıtyp jatyr» deıdi avtor.
Elimizde byltyr 15,3 mln sharshy metr turǵyn úı salyndy. Bul 2019 jylmen salystyrǵanda 16,8 paıyzǵa kóp. Memleket bıyl 17 mln sharshy metr baspana salýdy josparlap otyr.
