Onyń basty mindeti - keńestik kezeńdegi saıası qýǵyn-súrgin qurbandarynyń barlyq sanatyna qatysty tarıhı ádilettilikti qalpyna keltirý.
Jaqynda Qostanaı oblysy ákiminiń orynbasary Baqyt Esimovanyń tóraǵalyǵymen oblystyq komıssııanyń birinshi keńeıtilgen otyrysy bolyp ótti.
Otyrys barysynda vedomstvoaralyq ózara is-qımyl, zertteý jumysyn uıymdastyrý jáne oblys boıynsha júrgiziletin jumystardyń naqty maqsaty men mindetterin aıqyndaý máseleleri taldanyp, qarastyryldy.
Oblystyq komıssııa quramyna ǵalym-tarıhshy men ólketanýshylar, memlekettik organ jáne azamattyq qoǵam ókilderi arasynan 23 adam iriktelip alyndy. Komıssııa músheleri óz quzyreti sheginde saıası qýǵyn-súrgin qurbandaryn, onyń ishinde áskerı qyzmetshiler men tutqyndardy zańdyq jáne saıası aqtaý jumystaryn júzege asyratyn bolady.
Ol úshin arnaıy oblystyq jáne aýdandyq muraǵattarda qýǵyn-súrginge ushyraǵan azamattar týraly qujattamany anyqtaý, dalalyq zertteýler júrgizý, qýǵyn-súrginge ushyraǵan azamattardyń urpaqtary men týystarynan suhbat alý, qýǵyn-súrginge ushyraǵan azamattar týraly qujat, fotomaterıaldar men ózge de qujattamany jınaý jumystary uıymdastyrylmaq.
Osyǵan baılanysty ákimshilik-uıymdastyrýshylyq, zertteý jáne aqparattyq-túsindirý jumystaryn qamtıtyn 3 jumys toby quryldy, olardyń jumysy memlekettik organdardyń qoldaýymen júrgiziledi.
Komıssııa músheleriniń pikirinshe, bastapqy kezeńde, jappaı jerleý oryndary men aqtalmaǵan azamattardyń esimderin anyqtaý úshin aýdandarǵa turaqty túrde jumys isteıtin ekspedısııalardy jiberý qajet.
Oblys ákimniń orynbasary Baqyt Esimova óz sózinde:
- Bolashaq úshin este saqtaý jáne tarıhı ádilettilikti ornatý - bizdiń azamattyq paryzymyz. Al bizdiń jumysymyzdyń nátıjesi – urpaǵymyzǵa qaldyratyn mura, - dep atap ótti.
