«Árıne, qazaq halqy úshin, qazaq jerin mekendegen basqa etnos ókilderi úshin asharshylyq úlken tragedııa boldy. Biraq máseleni obektıvti turǵydan zertteý úshin emosııany qaldyryp, asharshylyqty ǵylymı fenomen retinde zertteý qajet», - dedi ǵalym.
Erkin Ábil asharshylyq aqıqaty týraly naqty derekterge negizdelgen ǵylymı jáne ǵylymı-kópshilik materıaldardyń jaryq kórgeni jón ekenin tilge tıek etti. Sonda ǵana keleshek urpaq Táýelsizdiktiń bizdiń halyqqa ońaı jetpegenin, sol jolda qanshama halyqtyń sheıit bolǵanyn seziner edi dedi tarıhshy-ǵalym.
Senat Tóraǵasy Máýlen Áshimbaev, óz kezeginde, asharshylyq taqyrybyn kóterý – qasterli Táýelsizdigimizdi nyǵaıtý, tól tarıhymyzdy jáne onyń sheshýshi kezeńderin tereń taný, tarıhtan taǵylym alý úshin kerek ekenin jetkizdi.
