Jadyra Rahmanqulqyzy alǵashqy eńbek jolyn 2001 jyly Joǵary medısına kolledjinen bastaǵan. Ol 19 jyl kásiptik bilim berýmen qatar qaladaǵy kolledj muǵalimderine hımııa páninen biliktiligin arttyrý boıynsha trenerlik etip kelgen. О́tken jyldyń qarasha aıynan bastap A.Pýshkın atyndaǵy №1 mektep-gımnazııasynda dırektordyń beıindik oqý isi jónindegi orynbasary retinde qyzmetin jalǵystyryp otyr.
Hımııa ǵylymdarynyń magıstri búginge deıin jaryq kórgen maqalalary men ǵylymı eńbekterin ekologııa men qorshaǵan ortany qorǵaý jáne adam densaýlyǵyn jaqsartýǵa baǵyttady.
J.Shábdennyń oqýshylary pándik olımpıadalarda, respýblıkalyq jáne qalalyq ǵylymı jobalar konkýrstarynda júldeli oryn ıelenip keledi.
Urpaqqa bilim berýmen birge zaman talabyna saı óz kásibı biliktiligin jetildirip otyrǵan ustaz birneshe halyqaralyq ǵylymı konferensııalar men olımpııadalarda belsendilik tanytqany úshin QR Bilim jáne Ǵylym mınıstrligi «Úzdik pedagog-2020» tós belgisimen marapattalǵan.
Qazirgi tańda, ulaǵatty ustazdyń jańartylǵan mazmundaǵy ádistemelik oqýlyǵy respýblıkada úsh tilde hımııa pánin oqytýda qoldanylyp keledi. Budan bólek, Ulttyq zııatkerlik menshik ınstıtýty tarapynan «Farmasııa mamandyǵyna arnalǵan beıorganıkalyq kýrsy» atty ǵylym týyndysyna patent berilgen.
Jadyra Rahmanqulqyzynyń jańashyldyǵy, ár balanyń jan dúnıesin tereń zerttep, tulǵa retinde qalyptasý jolynda atqarǵan eńbekteriniń arqasynda áriptesteri men shákirtteri aldynda zor qurmetke ıe.
