Shoshqa fermasynyń ıelerine qatysty qatań sharalar kásiporynda ekologııalyq normalar óreskel buzylǵany belgili bolǵannan keıin qoldanyldy. Bastapqyda bul týraly kásiporyn ornalasqan Bestamaq aýylynyń turǵyndary habarlady.
Jospardan tys tekserý barysynda shoshqa fermasyndaǵy barlyq óndiristik jáne bıologııalyq qaldyq, turmystyq jáne qurylys qaldyqtary aýyldyń janyndaǵy orǵa kómilgeni belgili boldy. Ol jerdiń aýmaǵy 6 gektarǵa jýyq.
Tekserýshiler 200 tonnaǵa jýyq qaldyqty qazyp shyǵardy. Budan basqa, kásiporyn eki jyl boıy qorshaǵan ortaǵa emıssııa bolmaı, ruqsatsyz jumys istegeni anyqtaldy. Fermada jobada aıtylǵan 40 myń shoshqanyń ornyna 50 myńnan asa shoshqa bolǵan. Barlyq zańbuzýshylyqtan kelgen jalpy zalal 7 mıllıard teńge boldy.
"Jınaqtaýysh toǵandarǵa jáne jergilikti terrıtorııaǵa óndiristik qaldyq sýdy aǵyzý bóliginde seriktestiktiń sharýashylyq qyzmeti toqtatyldy. Sondaı-aq zańbuzýshylyq joıylǵanǵa deıin bıologııalyq qaldyqtar qoımasyn paıdalanýǵa tyıym salyndy. Jaýapqa tartylǵan mekeme qorshaǵan ortaǵa emıssııaǵa ruqsat alý múmkindiginen aıyryldy", dedi sýdıa Janar Jubatova.
Aıta keteıik, byltyr 19 qarashada Aqtóbe oblysy Alǵa aýdany Bestamaq aýylynyń 80-nen astam turǵyny shoshqa fermasyn jabýdy talap etip, narazylyqqa shyqqany habarlanǵan edik. Keıin shoshqa fermasynyń ıesi Gaık Terterıan kásiporyn qandaı jaǵdaıda jabylatynyn aıtyp ótti.
