Kezdesý Qazaqstandaǵy parlamenttik saılaýdyń qorytyndylaryn jáne saıası reformalardyń barysyn talqylaýǵa, sondaı-aq Qazaqstan-Ázerbaıjan yntymaqtastyǵynyń keleshegi týraly pikir almasýǵa arnaldy.
Parlamenttik saılaýdy qorytyndylaı kele, Elshi kezdesýge qatysýshylardy Qazaqstanda kezeń-kezeńimen júrgizilip jatqan saıası reformalar týraly, onyń ishinde kóppartııalyqty damytý, áıelder men jastardy el saıasatyn qalyptastyrýǵa tartý, parlamenttik oppozısııa uǵymyn zańnamalyq resimdeý, aýyl ákimderin saılaý jónindegi sharalar týraly habardar etti. Prezıdent Qasym-Jomart Toqaev Elbasynyń strategııalyq baǵytyn jalǵastyra otyryp, táýelsizdiktiń 30 jyldyǵynda «halyq únine qulaq asatyn memleket» tujyrymdamasy aıasynda odan ári demokratııalandyrýǵa jáne azamattyq qoǵammen ózara is-qımyl jasaýǵa baǵyttalǵan jańa reformalarǵa bastamashy bolǵany jáne jalǵastyryp kele jatqany atap ótildi.
Prezıdent VII shaqyrylymdaǵy Parlamenttiń birinshi sessııasynyń ashylýynda usynǵan jańa bastamalary týraly aıta kele, otandyq dıplomat olardyń Qazaqstannyń saıası júıesin odan ári ınstıtýsıonaldyq damytý jáne adam quqyqtaryn qorǵaý tetikterin jetildirý turǵysynan erekshe mánge ıe ekenin atap ótti.
S.Ábdikárimov Qazaqstanda júrgizilip jatqan reformalar adamdardyń qoǵamdaǵy áleýetin dáıekti túrde ashýǵa baǵyttalǵanyn jáne olardy taıaýdaǵy on jylda tabysty iske asyrǵan kezde Qazaqstan eldiń jańa beınesi men ulttyń jańasha biregeıligin qalyptastyratynyn atap ótti.
О́z kezeginde Ázerbaıjan depýtattary men sarapshylary Qazaqstanda júrgizilip jatqan reformalarǵa joǵary baǵa berdi. Saıası partııalar arasyndaǵy básekelestik úshin jaǵdaı jasaý, azamattyq qoǵamdy onlaın-petısııalar arqyly sheshimder qabyldaýǵa tartý, memlekettik basqarýdy jańǵyrtý, sondaı-aq Qazaqstanda adam quqyqtaryn qorǵaý jónindegi ombýdsmen ınstıtýtyn damytý sııaqty ıdeıalar olardyń qyzyǵýshylyǵyn týdyrdy.
Qazaqstan-Ázerbaıjan yntymaqtastyǵynyń ózekti máselelerin talqylaı otyryp, kezdesýge qatysýshylar saıası, saýda-ekonomıkalyq jáne mádenı-gýmanıtarlyq salalardaǵy ózara tıimdi yntymaqtastyqty odan ári nyǵaıtýdy jaqtaıtyndyqtaryn rastady.
