Bul týraly jańalyqty oblys ákimi Ábilqaıyr Sqaqov turǵyndarmen eseptik kezdesýde jarııa etti. Jańa aýrýhana 500 oryn naýqasty qabyldaı alatyndaı etilip salynady. Mundaı iri medmekemeler oblysymyzda keńestik kezeńnen beri boı kótermegen.
Sondaı-aq basqa da medısına ortalyqtaryn damytý jalǵasyn tappaq. Máselen, 1-qalalyq aýrýhana ári qaraı jetildirilmek. Munda gıbrıdtik ota jasaý bólmeleri sekildi zamanaýı jabdyqtar ornatylmaq. Ekibastuzda qalalyq aýrýhananyń ınfeksııalyq bólimin damytý kózdelýde. Qolǵa alynatyn is-sharalar onymen shektelmeıdi.
– Kardıologııalyq ortalyqty tolyqqandy kardıohırýrgııalyq ortalyq deńgeıine jetkizbekpiz. Jerlesterimiz aılap kezek kútip otyrmaýlary tıis. Bizdiń mindet – kezek kútýdiń ýaqytyn barynsha qysqartyp, barlyq kómekti bir jerden kórsetýge qol jetkizý, – deıdi Ábilqaıyr Sqaqov.
Osy atalǵan is-sharalardyń barlyǵy medısınalyq kadrlar salasyn damytýdy, bilikti kadrlarmen qamtý máselesin kúsheıtýdi talap etedi. Ábilqaıyr Sqaqov densaýlyq saqtaý basqarmasyna osy baǵytty qatań baqylaýǵa alýdy buıyrdy.
Byltyr Pavlodar oblysy jedel járdem qyzmeti Qazaqstanda úzdik dep tanylyp, onyń avtoparki túgeldeı jańartyldy. Shalǵaıdaǵy aýdandarǵa biregeı jyljymaly medkeshender jóneltilip, óńirge «S» sanatyndaǵy «Hyundai H350» reanımobılderi keldi.
2020 jyly Pavlodarda qysqa merzim ishinde jańa modýldik ınfeksııalyq ortalyq ashyldy. 1-qalalyq aýrýhana keńeıtilip, qabyldaý bóliminiń aýdany ulǵaıdy.
