Kezdesý barysynda vedomstvo basshysy oblys ekologııasyn jaqsartý boıynsha belgilengen josparlardy tıimdi iske asyrý úshin birlesken jumysty kúsheıtýdiń mańyzdylyǵyna toqtaldy.
«Bizdi aımaqtaǵy ekologııalyq jaǵdaı alańdatady. Atyraý elimizdiń eń lastanǵan qalalarynyń qataryna kiredi. Árıne, bul jaǵdaıdy jaqsartý qajet. Bul mańyzdy jumysta siz sııaqty belsendi azamattar tarapynan qoldaý, kómek qajet. Men qashanda syndarly dıalogqa ashyqpyn jáne ashyq bola beremin», - dep atap ótti mınıstr.
Maǵzum Myrzaǵalıev Atyraý oblysynyń ekologııalyq problemalaryn sheshý úshin 40 is-sharadan turatyn Jol kartasy ázirlengenin atap ótti. Olardyń qatarynda jańa kárizdik tazartý keshenderin salý jáne eskilerin qalpyna keltirý, «Sasyq saı» jáne «Sharshy» býlaný alańdaryn rekýltıvasııalaý, Oral ózeniniń basseınin kógaldandyrý, tazartý, saýyqtyrý jáne basqa da mańyzdy is - sharalar bar.
«Biz Atyraýdyń ekologtarymen, qoǵam ókilderimen birneshe ret kezdestik. Kezdesýlerimizdiń nátıjesi Jol kartasyn qabyldaý boldy. Jańa Ekologııalyq kodeks te osy baǵytta perspektıvaly múmkindikter ashatynyn atap ótkim keledi. Eń mańyzdylarynyń biri – kodeks iri lastaǵyshtardyń áleýmettik jaýapkershiligin arttyrýǵa múmkindik beredi», - dep tolyqtyrdy ekologııa mınıstri.
Onyń aıtýynsha, qazirdiń ózinde 1-sanatqa jatatyn kóptegen kásiporyndar eń ozyq qoljetimdi tehnologııalardy engizý boıynsha daıyndyq sharalaryn júrgizýde, demek, bolashaqta atmosferaǵa lastaýshy zattardyń shyǵaryndylary aıtarlyqtaı azaıady.
Sonymen qatar, mınıstr Atyraýda óńirdiń barlyq negizgi ekologııalyq problemalaryn tirkeý boıynsha front-ofıs ashýdy usyndy.
«Birlesken jumys úshin kóptegen quraldar bar. Bizdiń mınıstrlik jaqynda quryldy. Bir jarym jyl ishinde aýqymdy jumys atqaryldy, ekologııalyq máselelerdi sheshýdiń tetigi jasaldy. Ýaqyt óte kele biz Jol kartasynyń, jańa Ekologııalyq kodekstiń tarmaqtaryn iske asyrýdyń tıimdi nátıjelerin kóretinimizge senimdimin», - dep túıindedi Maǵzum Myrzaǵalıev.
