Máseleniń mánisi – eldegi bıliktiń áskerge ótýinde. Prezıdent Vın Mınge Parlament saılaýyna aralasty, onyń nátıjesin burmalaýǵa jol berdi degen aıyp taǵylyp, temir torǵa toǵytyldy. Al ásker aldaǵy 1 jylda eldi basqaratynyn habarlaǵan-dy. Endi Mıanma halqy kóshege shyqty. Olar ádil júıe, adal basshy kerek degen urandy alǵa tartady.
Senbi – shamamen eki apta buryn bastalǵan narazylyq aksııasyndaǵy qaraly kún retinde saqtaldy. Ásker alańǵa shyqqan azamattarǵa kúsh kórsetip, qarý qoldandy. Birqatar sheteldik basylym ýly gaz qoldanýmen qatar, oq atylǵanyn habarlady. Erikti qutqarý tobynyń volonteri Hleng Mın O eki adamnyń qaza tapqanyn málimdedi. Onyń aıtýynsha, olardyń bireýi – jasóspirim. Bul aqparatty resmı qurylymdar da rastap otyr. Agence France-Presse-ke Qutqarý qyzmetiniń ókili «18 jasqa tolmaǵan azamattyń basyna oq tıip qaıtys boldy» dep málimdeme jasaǵan. Buǵan qosa, Parahıta Darhı erikti qutqarý qyzmetiniń basshysy Ko Ang «Odan bólek 20-dan asa adam túrli jaraqat aldy. Beseýine rezeńke oq tıgen. Olardy jedel járdem alyp ketti», dep habarlady.
Eldegi jaǵdaıda azamattyq qoǵam ókilderi belsendilik tanytýda. Eriktiler qyzmeti men toptar bólinip, jaralanǵandarǵa alǵashqy kómek kórsetýde. BAQ pen halyqaralyq uıymdarǵa aqparat jetkizýshi kópir de solar. Osy oraıda Eýropalyq odaq ta máseleni nazardan tys qaldyrmady. Olar elde «durys sheshim qabyldanýy kerek» degen oı aıtty. Alaıda naqty usynys bildirilmedi.
«Ádildikti talap etip shyqqan azamattarǵa qysym kórsetip, qarý kezeýdi qoldamaımyn. Mıanma bıligi men áskeri azamattarǵa qysym kórsetýdi dereý toqtatsyn», degen tapsyrma berdi EO-nyń Syrtqy saıasat bóliminiń jetekshisi Djozep Borrel. Eýroodaqtaǵy laýazymdy tulǵalar ony qoldaıtynyn bildirip, áleýmettik jelilerde áriptesin jaqtaıtyn pikirler aıtty. Oǵan qosa, Eýropalyq odaqqa múshe elderdiń Syrtqy ister mınıstrleri dúısenbide Mıanmadaǵy jaǵdaıǵa qatysty otyrys ótkizip, sheshim joldaryn talqylaıtynyn habarlady.
Soǵan qaraǵanda, Eýropa memleketteri Mıanma bıligine sanksııa salýy múmkin. Bulaı deýge AQSh pen Ulybrıtanııa jarııalaǵan sanksııalar da sep bolyp otyr. Ulybrıtanııa Syrtqy ister mınıstri Domınık Raab qarapaıym halyqqa qysym kórsetken bılikke qatysty odan arǵy qatynas áli de talqylanatynyn málimdedi.
Eldegi jaǵdaıdan japa shekken – halyq. Burynǵy memleket basshysy jaýapqa tartylsa da, jańa bılik jarylqamady. Tizgindi qolyna alǵaly 1 aı ótip úlgermeı, bul joly da dıktatýranyń lebi esti. Ásker qolynan qaza tapqan azamattardyń ekinshisi – jas qyz. Keshe memlekettegi iri qalalardyń biri Iаngonda myńǵa jýyq adam boı kóterdi. Jalpy, el boıynsha 10 myń adam narazylyq aksııasyna jınalypty.
Belsendiler ózderin adam ólimi de toqtatpaıtynyn málimdedi. Oqıǵa budan da órshı túsýi múmkin degen boljam bar. О́ıtkeni belsendilerdiń biri ár kúnniń nemen aıaqtalary belgisiz degen oı aıtady. Reuters agenttigine suhbat bergen belsendi Hın Maý Maý O «Búgin sońǵy kúnim shyǵar, ne bolsa da sońyna deıin kúresýim kerek degen ustanymmen júremiz. Elde ınternetti buǵattap, halyqqa aıaýsyz qysym jasaǵan bıliktiń qajeti joǵyn jetkizý – mindetimiz. Ol úshin ólý kerek bolsa da daıynbyz. Biz demokratııany qalaımyz!» deıdi.
