«Dúnıejúzilik meteorologııalyq uıymnyń usynystaryna sáıkes, el aýmaǵyndaǵy baqylaý jelisi búgingi jaǵdaıdan úlken bolýy tıis. Osyǵan baılanysty beketter sany boıynsha kórsetkishti 2025 jylǵa qaraı 550 birlikke deıin jetkizý úshin keshendi sharalar qabyldaý josparyn ázirledik», dedi Qazgıdromet basshysynyń orynbasary.
Sonymen qatar S.Saırov bıylǵy 1 aqpandaǵy jaǵdaı boıynsha respýblıka ózenderiniń basseınderindegi gıdrometeorologııalyq jaǵdaı boıynsha aldyn ala derekterdi de atap ótti. Osylaısha, elimizdiń barlyq aýmaǵynda qar qorynyń kólemi kóp jyldyq ortasha mánderden az ekeni aıtyldy.
«Qazaqstanda 8 ózen sý sharýashylyǵy basseıni bar. Onyń árqaısysy boıynsha uqsas jaǵdaı qalyptasady – qar qorynyń kólemi normadan az alyndy. Bul jaǵdaılar aldaǵy jyly kóptegen ózender úshin sý az bolatyndyǵyn kórsetedi. Ásirese Almaty, Jambyl, Túrkistan, Qyzylorda, Aqtóbe, Atyraý jáne Batys Qazaqstan oblystarynda», dedi ol.
Sonymen qatar S.Saırov qazirgi ýaqytta gıdrologııalyq boljaýdyń qoldanystaǵy ádisterin jetildirý boıynsha sharalar qabyldanyp jatqanyn jetkizdi.
«Sý tasqyny kezinde ózen rejimin boljaý mańyzdy jáne kúrdeli mindet sanalady. Sondyqtan 2020 jyly basshylyqqa alatyn qujattardy, mysaly gıdrologııalyq boljamdardy jasaý erejelerin, Qazaqstan ózenderiniń kóktemgi sý tasqyny aǵynyn boljaý jónindegi nusqaýlyqty, jazyq ózenderdiń kóktemgi sý tasqyny aǵynynyń kólemin boljaý jónindegi ádistemelik jazbalardy ázirlep, jetildirdik. Ázirlengen ádistemeler sý resýrstary salasyndaǵy jetekshi ǵalymdar men mamandardyń oń pikirine ıe boldy», dedi ol.
Qazgıdromet baqylaý jelisiniń derekterin paıdalanýdan basqa, kóktemgi sý tasqyny kezeńindegi aǵyn kólemderin boljaý úshin aýa raıynyń ortasha-shuǵyl boljamdarynyń eýropalyq ortalyǵynyń spýtnıktik derekteri, swim jáne HBV-light sandyq modelderi de qoldanylady.
«2021-2022 jyldarǵa arnalǵan josparda – HBV 6.4 shved modeliniń jańa nusqasyn Qazaqstannyń jaǵdaıyna beıimdeý tur», deıdi S.Saırov. Qazgıdromet basshysynyń orynbasary elimizdiń shaǵyn ózenderiniń problemalaryn zertteý máselesi boıynsha kásiporyn qazirgi jaǵdaıdy egjeı-tegjeıli zertteý úshin Jem jáne Oıyl shaǵyn ózenderine ekspedısııalar josparlap otyrǵanyn atap ótti.
«21 aqpanda oqıǵa ornynda alǵashqy tekserý josparlanǵan, sodan keıin aýa-raıy jaqsarǵan soń, egjeı-tegjeıli taldaý júrgizý úshin osy ózenderge taǵy bir ekspedısııa uıymdastyrylady. Osyndaı tájirıbeni elimizdiń basqa da shaǵyn ózenderinde júzege asyrýdy josparlap otyrmyz», dep túıindedi ol.
