«Petro Retail» JShS-niń «Qazaq oil» kesheni qala irgesindegi Birqazan eldi-mekeniniń tusynan salynǵan. Jańa bekettiń ashylýyna qala ákiminiń mindetin atqarýshy Bektas Nurıdınov qatysyp, keshenniń jumysyna sáttilik tiledi.
«Jalpy kásipkerlikti damytýǵa qala ákimdigi tarapynan úlken qoldaý kórsetilip keledi. Búgingi keshenniń ashylýy osynyń bir kórinisi. Kásipkerge qala ákimdiginiń kórsetken qoldaýynyń arqasynda keshen salýǵa jer bólinip, qalaǵa qosymsha ınvestısııa tartyldy. Qazirgideı qıyn kezeńge qaramaı kásip ashyp, turǵyndar jumyspen qamtylyp, qalamyzda kásipkerlik nysandarynyń sany artyp keledi» - degen Bektas Balǵabaıuly qala ákimdigi kásip bastaýǵa nıetti azamattarǵa qashan da qoldaý bildiretindigin aıtty.
Jańa keshende kelýshiler úshin bólshek saýda pýnkti men tamaqtaný orny qarastyrylǵan. Bir táýlikte 700 kólikke deıin qyzmet kórsete alatyn bekette 23 adam jumyspen qamtylǵan. Nysanǵa «Petro Retail» JShS-niń 700 mln teńge jumsaǵan.
«Petro Retail» JShS ókili Aıdar Balǵojaevtyń aıtýynsha respýblıka boıynsha 400-ge jýyq «Qazaq oil» beketi halyqqa qyzmet etedi. Bıyl Qyzylorda oblysynyń Aral, Qarmaqshy aýdandarynda jáne Qyzylorda qalasynda 4 nysan óz jumysyn bastaǵan. Sonymen qatar jaqyn kúnderi 98 markaly benzın otynyn qala naryǵynda alǵash bolyp satylymǵa shaǵyraýdy josparlap otyrǵandyqtaryn da atap ótti.
Aıta keteıik, «QazAvtoJol» AQ-nyń óńirlik fılıaly men jergilikti atqarýshy bılik kelisimine sáıkes «Batys Eýropa-Batys Qytaı» halyqaralyq kólik dáliziniń boıynda 41 jol boıy servıstik nysan salynatyn jer belgilengen. Onyń ishinde 10 joba qala úlesinde bolsa, qazir 6 joba iske qosyldy. Búgin jumysyn bastaǵan «Qazaq oil» kesheni jetinshi joba bolyp otyr.
