Túrkistan oblysy PD bastyǵy polısııa Qaırat Dálbekovtiń tapsyrmasyna sáıkes, oblys aýmaǵynda zańsyz saqtaýdaǵy qarýdy jáne oq-dárilerdi tárkileýge, olardy satyp alý kózderin anyqtaýǵa, ony zańsyz jetkizý arnalaryn anyqtaý jáne olardy joıýǵa, qarýdy zańsyz saqtaý men alyp júrýmen aınalysatyn tulǵalar men uıymdasqan qylmystyq toptardy anyqtaý, otty atys qarýmen jasalatyn qylmystardyń aldyn alý, eskertý jáne olardy ashý maqsatynda aýqymdy is-shara uıymdastyryldy. Atalǵan “Qarý” jedel-profılaktıkalyq is-sharasy 13-i men 20 aqpan kúnderi aralyǵynda qarqyndy júrgizildi.
Túrkistan oblysynyń polıseıleri is-sharanyń segiz táýliginde jalpy tirkelmegen 46 qarý, onyń ishinde eki dana oıyq uńǵyly, 35 dana ańshy, úsh dana travmatıkalyq, bir dana kesilgen (obrez), eki dana tapansha, eki dana gazdy tapansha jáne bir dana qoldan jasalynǵan qarý tárkiledi. Barlyǵy 7055 qarý ıeleri tekserilip, 374 ákimshilik quqyq buzýshylyq anyqtalǵan. Onyń ishinde QR ÁQBtK-niń 482-baby (Zańsyz qarý saqtaý) boıynsha 26 hattama, 484-baby (Qarýdyń saqtaý erejelerin buzý) boıynsha 290 hattama, 486-baby (Qarýdyń tirkeý jáne qaıta tirkeý tártibin buzý) boıynsha 60 hattama toltyrylǵan.
Máselen, Otyrar aýdany Qarǵaly aýylyna qarasty mal qystaýda Aqtóbe aýylynyń turǵyny 16-kalıbrli ańshy qarýyn zańsyz alyp júrgendigi anyqtalǵan. Al, Qarǵaly aýylyna qarasty Syrdarııa ózeni boıynda turatyn turǵynnyń úıinen zańsyz oıyq uńǵyly atys qarýy tabylyp, atalmysh quqyq buzýshylyqqa qatysty shara kórilgen.
Odan bólek, Kentaý qalasy turǵyny tirkelmegen “TOZ” markaly 16 kalıbrli eki uńǵyly qarýdy zańsyz saqtaǵandyǵy anyqtalǵan. Sonymen qatar Keles aýdany Aqtóbe aýylynyń turǵynynan tirkelmegen “TOZ” markaly 16 kalıbrli eki uńǵyly qarý anyqtalǵan.
О́z kezeginde Túrkistan oblysynyń polıseıleri “Qarý” jedel-profılaktıkalyq is-sharasynyń óz jalǵasyn tabatynyn eskertedi. Tirkelmegen qarýlaryńyz bolsa, polısııaǵa tapsyrýǵa keńes beredi.
