JAÝYNGER ORDENI IESIN TAPTY

Kúrkirep kúndeı, ótti ǵoı soǵys, degen. Búginde sol Jeńisti jaqyndatý úshin tolarsaqtan qan keshken ardagerlerdiń erligin ulyqtaý, esimin qurmetteý, urpaqqa úlgi etý máselesi sheshimin tapqan. Memleket basshysynyń bıylǵy Joldaýynda maıdanǵa qatysqan kózi tiri ardagerlerge jáne tyl eńbekkerlerine qamqorlyq kórsetý jaıy jan-jaqty atap kórsetilgeni de osy ıgilikti istiń jalǵasy deýge bolady. Qazaqstandyqtardyń soǵysqa qosqan úlesi aıryqsha ekeni de anyq. Sol surapyl jyldary el ekonomıkasy áskerı salaǵa aýys­tyrylsa, qarapaıym halyq evakýasııalanǵan kóp adamǵa pana boldy. Erlik pen órlikti boıyna darytqan uldarymyz ben qyz­dary­myz qandy shaıqastarda erliktiń eren úlgisin kórsetip, omyraý­laryn orden, medaldarǵa toltyrdy. Alasapyran kezde keıbir maıdan­ger­lerdiń marapattary ózderine jetpeı qalǵan kezderi de kezdesti. Almaty qalasyndaǵy Reseı ǵylym jáne mádenıet ortalyǵynyń basshysy, Qazaqstandaǵy Reseı konsýldyǵynyń bas kon­sýly Ildýs Tarhanov Jetisý jerinde bolyp, Uly Otan soǵy­sy­nyń tarıhyna sholý jasap, Qazaq eliniń ólsheýsiz úlesi jaıly áńgimeledi. Jıynda Uly Otan soǵysynyń ardageri Julyn Káribaevtyń ulyna ákesiniń kózi tirisinde berilmeı qalǵan Uly Otan soǵysy­nyń I dárejeli ordenin tapsyryp, №240 atqyshtar dıvızııa­syndaǵy efreıtor, BTR nysanashysy bolǵandaǵy erligi jaıly baıandady. Ardagerdiń nagradasy otbasyna máńgi estelik retinde berildi. Osylaısha marapat maıdangerdiń otbasyna oraldy. Muraǵatta zertteý jumystary jalǵasyp, ıesin tappaǵan marapat­tar áli de bar ekeni daýsyz, degen bas konsýl Jeńistiń 65 jyldyǵyna arnalǵan medaldardy Reseı azamattary qataryndaǵy 12 soǵys ardageri men jaýynger-ınternasıonalısterge tapsyrdy. “Jerlesterdiń dańqyn maqtan etemiz” aksııasyna ulasqan jıynda oblystyq slavıan jastary qozǵalysynyń ókilderi jas urpaq tárbıesine belsene qatysyp, ónegeli ómir joldarymen yqpal etken ardagerlerge syılyq tabys etti. Ardagerler “Dostyq úıiniń” aldyndaǵy “Dańq alleıasyna” qaıyń kóshetterin otyrǵyzdy. Kúmisjan BAIJAN. Almaty oblysy.