Oblystyq aýyl sharýashylyq basqarmasy basshysynyń mindetin atqarýshy Marat Shuǵaevtyń aıtýyna qaraǵanda, óńirimizde barlyǵy aýyl sharýashylyǵy ónimin óńdeıtin 264 oryn bar. Olar 2020 jyly 100 mlrd teńgege jýyq ónim óndirgen.
– Oblys jergilikti jerde shyǵarylatyn azyq-túlik ónimderimen qamtylǵan, – deıdi Marat Shuǵaev.
Oblys tutynatyn kólemnen tórt ese artyq mólsherde makaronmen, unmen – 162%, jarmalarmen – 136%, nanmen – 124 prosentke qamtylǵan. 2020 jyly barlyǵy 23,7 mln AQSh dollary somasyna 51 myń tonna ónim eksportqa shyǵaryldy. О́ńirde kartop pen ózge de kókónis óndirisi jyldan jylǵa artyp keledi. Máselen, byltyr 550 myń tonna kartop, 199 myń tonna sábiz ónidirildi. Qajetti mólsherden jeti jáne 11 esege artyq.
Degenmen, oblysta óndirilmeıtin azyq-túlik ónimderiniń ornyn basý úshin 2021 jyly birqatar iri jobalar júzege asyrylady. Solardyń biri – «Pavlodar agrokesheni» JShS qolǵa alatyn rafınadtalǵan maı óndirý sehi. Qýattylyǵy jylyna 900 tonna. Oǵan qosa bıyl Zarıa aýylynda «PAK GreenEcoProduct» JShS fırmasymen quny 2,5 mlrd teńgege kartop óńdeý zaýyty salynbaq.
Oblys ákimi Ábilqaıyr Sqaqov oblysty azyq-túlikpen tolyqtaı táýelsiz etý úshin aýyl sharýashylyq ónimderin qaıta óńdeý baǵytynda josparlanǵan 2,5 – 3,5 mlrd teńgeniń jetkiliksiz qarajat ekendigin atap ótti.
– Aýyl sharýashylyq ónimderin qaıta óńdeý negizgi máseleniń biri bolýy tıis. Bul aýyldardaǵy jańa óndiris, jumys oryndary men shaǵyn jáne orta kásipkerligi damýynyń qaınar kózi. Sol sebepti oblys kóleminde bul salaǵa bólinetin 3,5 mlrd teńge tym az. Osy máseleni qaıta qaraý kerek, – deıdi Ábilqaıyr Sqaqov.
Aıta keteıik, 2021 jyly eki mıllıard teńgege aýyl sharýashylyq ónimderin qaıta óńdeıtin 14 jańa nysan paıdalanýǵa beriledi.
