О́tken jyldyń jeltoqsan aıynda Kásipkerler palatasyna aımaqtaǵy birqatar farmasevtıka salasyndaǵy kásipkerlerden kórsetken qyzmeti úshin qarajatyn tolyq ala almaı júrgendigi jóninde, atalmysh máselege qatysty quqyqtyq qoldaý kórsetýdi suraǵan ótinishter tústi.
Másele mynada. Qazaly aýdanaralyq aýrýhanasy farmasevtıka salasyndaǵy 5 kásipkerge 110 mln teńgeden astam qarjy qaryz bolyp shyqty. Bul qaryz keshe-búgin qalyptasqan bereshek emes, aldy 2017 jyldan bastap jınaqtalyp qalǵan eken. Kásipkerler Qazalydaǵy aýrýhanaǵa dári-dármekter, medısınalyq buıymdar jetkizip berý qyzmetterin kórsetip kelgen.
Kásipkerler palatasy zańgerleri atalmysh máseleni jan-jaqty zertteı kele oblys prokýrory Nurlan Bıjanovpen kezdesý uıymdastyryp, bıznes ókilderiniń máselesin osy otyrysta kóteredi.
«Bıznes ókilderin jaqsy túsinýge bolady. Dári-dármek, medısınalyq buıymdarǵa bıýdjetten arnaıy qarjy bólinip otyr. Alaıda atalmysh qarjynyń nysanaly maqsatyna jetpeýi kásipkerlerge qıyndyq týdyrýda. Olar da kórsetetin qyzmetterine qajetti qural-jabdyqtar men dárilerdi aldyrtady. Ol úshin qarjysyn tolyq tóleıdi. Al aýrýhana tarapynan qarjynyń ýaqytyly tólenbeýi farmasevtıka salasyndaǵy kompanııalardyń turaqty jumys ornyn saqtap qalýda, eńbekaqylardy ýaqytyly tóleýde salmaq salýda. Osy jerde oblys prokýrory Nurlan Bıjanovqa arnaıy alǵysymyzdy bildirgimiz keledi. Kásipkerlermen kezdesýden keıin máseleni óz baqylaýyna alyp, sheshilýine septigi tııýde», - deıdi bıznes-ombýdsmen apparatynyń oblys boıynsha sektor meńgerýshisi Salavat Qulmahan.
Kásipkerler palatasy men oblystyq prokýratýranyń aralasýymen búginde kásipkerlerge 29 mln 491 myń teńge tólendi. Al qalǵan 80 mln 708 myń teńge qaryzdy aýrýhana basshylyǵy jyl sońyna deıin tólep beretindigin jetkizdi.
О́ńir farmasevteriniń máselesi Kásipkerler palatasy úshin áli de kún tártibinde. Palata zańgerleri sala kásipkerlerine quqyqtyq súıemeldeý jumystaryn jalǵastyrady.
