Batys Qazaqstan oblysynyń Aqjaıyq aýdany Atameken aýylynan 10 shaqyrym jerde eki «Toıota kamrı» avtokóligi betpe bet soqtyǵysqan. Osydan 4 kún buryn 6 adam qaza tapqan jantúrshigerlik jol apaty da dál osy jerde bolǵan edi.
Sońǵy kúnderi óńirde qatty boran soǵyp, aýa raıynyń nasharlaýyna baılanysty avtojoldar jıi jabyldy. Máselen «QazAvtoJol» mekemesiniń oblystyq fılıaly 2021 jylǵy 26 aqpan kúni tún ortasynan bastap respýblıkalyq mańyzy bar Atyraý-Oral jolynyń 492-189 shaqyrymy arasynda barlyq avtokólik túrlerine jolǵa shyǵýǵa bolmaıtynyn habarlaǵan edi. Alaıda jol apatyna túsken taksı júrgizýshisiniń biri polısııa qyzmetkerleriniń talabyna baǵynbaı jolǵa shyǵyp ketkeni belgili boldy.
Sonymen, oqıǵa ornynda 4 adam qaza tapqan, olar – Qaztalov aýdany Bostandyq aýylynyń turǵyny, 33 jasar er adam, Chapaev aýylynyń turǵyny 48 jasar er adam, Petropavl qalasynyń turǵyny 38 jasar er adam, taǵy bir er adamnyń kim ekendigi anyqtalýda.
Jaraqat alǵandar: 35 jastaǵy Oral qalasynyń turǵyny, er adam mańdaı súıegi synǵan. 52 jasar oraldyq er adamnyń da jaraqaty dál osyndaı, mańdaı súıegi synǵan. 1987 jyly týǵan atyraýlyq jigittiń qabyrǵasy synǵan. Onymen qurdas oraldyq jigittiń beti sydyrylyp jaraqattanǵan. 1987 jyly týǵan taǵy bir jigittiń betinde, keýdesinde syrylǵan kóptegen jaraqaty bar. Taǵy bir 30 jasar oraldyq jigittiń de bet-júzi búlingen.
Atyraý-Oral tas joly boıynda, Aqjaıyq aýdany aýmaǵynda sońǵy bes kún ishinde jol apatynan 12 adam qaza tapty. Polısııa oblys turǵyndaryn asa qajettilik bolmasa jolǵa shyqpaýǵa, júrgizýshilerdi jol erejesin saqtap, óte abaı bolýǵa shaqyrýda.
