Nursultan Nazarbaev Qory men Qazaqstannyń isker áıelder qaýymdastyǵy «Qaıyrymdylyq kerýeni» respýblıkalyq baıqaýyn osymen úshinshi jyl uıymdastyryp jatyr.  

Is-sharaǵa Almaty qalasynyń ákimi Baqytjan Saǵyntaev qatysty. 

Baıqaý qaıyrymdylyq ıdeıalaryn nasıhattaýǵa, belsendi azamattyq bastamany damytýǵa baǵyttalǵan. 

Jobaǵa qatysýshylar - jarqyn tulǵalar. Olar muqtaj adamdarǵa kómektesedi, qaıyrymdylyqpen belsendi aınalysady, batyldyq tanytady. Olardyń arasynda elimizdiń mádenıetin damytýǵa at salysatyn, ekologııalyq máselelerdi sheshetin, áleýmettik kásipkerlikti júzege asyratyndar da bar.

Dástúrli túrde baıqaý jeńimpazdarynyń esimderi bes nomınasııa aıasynda anyqtalady: «Asar», «Týǵan jer», «Meıirim jolynda», «Batyl júrek», «Qaıyrymdylyq tarıhy». Alaıda, bıyl komıssııa músheleri taǵy eki nomınasııa – «Bala júregi» jáne «Janýarǵa meıirim» nomınasııalaryn taǵaıyndaý týraly sheshim qabyldady. 

Baıqaýdyń mańyzdylyǵyn atap ótken Nursultan Nazarbaev Qorynyń dırektory Darıǵa Nazarbaeva baıqaýǵa qatysýǵa nıet etken meıirimdi, qaıyrymdy adamdardyń sany jyl saıyn kóbeıip kele jatqanyna nazar aýdardy. Alǵashqy baıqaý uıymdastyrylǵannan bergi úsh jylda qatysýshylar sany jeti esege artyp, 2020 jyldyń ózinde 667 adamdy quraǵan.

- Bıylǵy «Qaıyrymdylyq kerýeni» erekshe. Koronavırýs pandemııasy, karantındik shekteýler árqaısymyzdyń ómirimizge áser etti. Búgingi sharaǵa qatysýshylar arasynda osy qıyn-qystaý kezeńde óz kúshteri men múmkindikterin aıamaǵandardy erekshe atap ótkim keledi, - dedi Qor dırektory.

Onyń pikirinshe, «árbir oqıǵanyń artynda adam basyna túsken qaıǵy men muń jáne meıirimdilik pen mahabbat tur. Meıirimdilik pen  yntymaqtastyq  birlesken kezde, tótep bere almaıtyn qıyndyq bolmaq emes! Jarqyn oqıǵalardyń kýási bolý úlken qýanysh. Sondaı-aq, halqymyz úshin, elimiz úshin, týǵan Qazaqstanymyz úshin maqtanysh sezimi oıanady».

Darıǵa Nursultanqyzy «Baıqaýǵa qatysýshylar ózgelerge jaqsylyq jasaýdan lázzat tabatyn, ómirge qushtar keń júrekti jandar, olar ózderiniń jarqyn is-áreketterimen óskeleń urpaqqa úlgi bolyp qana qoımaı, meıirimdi bolýǵa yntalandyrady», - dep atap ótti.

Baıqaýǵa qatysýshylar – ómirdiń túrli salasynda qyzmet etetin adamdar - kásipkerler, qoǵamdyq uıym ókilderi, bilim berý salasynyń mamandary, erekshe qajettilikteri bar adamdar, quqyq qorǵaý organdarynyń qyzmetkerleri, jýrnalıster men blogerler.

Komıssııa múshelerine jeńimpazdardy anyqtaý ońaı bolǵan joq, óıtkeni árbir qatysýshynyń izgilikke, gýmanızm men patrıotızmge toly erekshe jáne áserli tarıhy bar.

Jeti atalymnyń árqaısysy boıynsha jeńimpazdar anyqtalyp, olarǵa I, II jáne III oryndar berildi. Sonymen qatar júldeli oryndarǵa ıe bolmaǵan úzdik fınalıster yntalandyrý syılyqtaryn ıelendi. 

«Qaıyrymdylyq kerýeni»  I oryn ıegerleri:

- «Asar» nomınasııasynda - Abylaıhan Asylbaı,Semeı qalasy. Birinshi oryn qazaqstandyq jáne sheteldik qoǵam arasynda ulttyq qol óner buıymdaryn daıyndaý dástúrin tanymal etýge qosqan erekshe úlesi úshin berildi;

- «Týǵan jer» nomınasııasy - Dáýren Kúldishev, Semeı qalasynyń turǵyny. Ol kóp balaly otbasylarǵa kómegin aıaǵan emes, sondaı-aq koronavırýs pandemııasy kezinde adamdardy qutqarýǵa at salysty (17 mln. teńgege 185 О́JJ apparaty, dárilik zattar satyp alyndy, medısınalyq qyzmetkerlerdi tamaqtandyrý uıymdastyryldy);

- «Batyl júrek» nomınasııasynda Qostanaı oblysynyń turǵyny Alekseı Sychýgov marapattaldy. Jas jigit 4 jastaǵy balanyń baýyryn aýystyrýǵa donor boldy;

- «Meıirim jolynda» nomınasııasy Nur-Sultan qalasynyń «Shapaǵat» qaıyrymdylyq qoryna kóp balaly jáne az qamtylǵan otbasylarǵa turaqty negizde materıaldyq kómek kórsetkeni úshin berildi. Qor 20 myńnan astam otbasyǵa kómektesti - 100 tonnadan astam azyq-túlik taratyldy;

- Batys Qazaqstan oblysynyń «Syrym eli» qoǵamdyq-saıası gazeti «Qaıyrymdylyq tarıhy» nomınasııasy boıynsha úzdik dep tanyldy. BAQ oblys turǵyndarynyń problemalaryn jarııalap, olardy sheshýge septigin tıgizedi. Gazettiń belsendi pozısııasynyń arqasynda 13 ottegi konsentratory men dári-dármekter, eki otbasy úshin úı satyp alyndy;

- «Bala júregi» nomınasııasynda - Batys Qazaqstan oblysynan kelgen 16 jasar Dana О́tebaeva úzdik atandy. Marapat órt kezinde 3 balany qutqarýdaǵy eren erligi i úshin berildi;

- «Janýarǵa meıirim» nomınasııasynda О́skemen qalasynan kelgen Borıs Sherbakov atap ótildi. Borıs Shyǵys Qazaqstan tabıǵatyn dáripteýge úlken úles qosty, botanıka, faýnıstıka, ekologııa boıynsha 200-ge jýyq ǵylymı jumystar men kitaptar shyǵardy. Chechek shatqalynda «Mektep janyndaǵy ekologııalyq qoryq» uıymdastyrdy, onda jas natýralıster ekologııalyq praktıkadan ótip, ózderiniń ǵylymı izdenisterin júrgize alady.