Qoǵam • 02 Naýryz, 2021

Qalypty ómirge oralý qadamy

9 ret kórsetildi

Koronavırýstyń taralýyna jol bermeý jónindegi vedomstvoaralyq komıssııa 1 naýryz kúni Qazaqstan aımaqtaryndaǵy epıdemııalyq jaǵdaıdy baǵalaý matrısasyn jarııalady. Soǵan sáıkes búginde elimizdiń birde-bir óńiri «qyzyl aımaqtyń» qatarynda emes. Odan bir kún buryn «qyzarǵan» Nur-Sultan qalasy qaıtadan «sary aımaqqa» ótti. Buǵan qosa bul sanatta Aqmola, Batys Qazaqstan, Qostanaı, Pavlodar oblystary bar. Al ózge óńirler «jasyl aımaqta».

Elimizde epıdemııalyq ahýal turaq­ta­lyp, indet juqtyrǵandardyń qatary kemip keledi. Sońǵy derek boıynsha bir táýlikte PTR arqyly 622 adamnyń Covid-19-ben aýyrǵany rastaldy. Son­daı-aq 547 adam indetten aıyqqan. Den­saýlyq saqtaý mınıstrligi qazirgi ýaqytta 20 140 adamnyń koro­­navırýs ınfeksııasynan emdelip jat­qanyn habarlady. Onyń ishinde 4 472 naýqas stasıonarda, 15 668 naýqas ambý­la­torlyq deńgeıde em qabyl­daý­da. Indetke shaldyqqandardyń arasynda 248 adamnyń jaǵdaıy aýyr, 50 naýqastyń jaǵdaıy óte aýyr, 44 naýqas О́JJ appa­ratynda jatyr. Al koronavırýs ınfek­sııa­synyń belgileri bar pnevmonııa 10 adamnan anyqtaldy, 3 adam osy indettiń saldarynan dem jetpeı baqılyq boldy.

Indettiń taralý qarqyny báseńdep, jaǵ­daı aıtarlyqtaı ońalyp qalǵan eli­miz qazir «jasyl aımaqta» tur. «Jaý joq deme, jar astynda» degendeı, qan­sha jerden qaýiptiń beti qaıt­qan­men, saqtyq sharalaryn qatań usta­ný­dy áste qaperden shyǵarmaǵan jón. Degenmen «Samarqannyń kók tasyn jibi­tetin kúnniń» jaqyndaýymen qatań shara­lar da biraz bosańsıtyn túri bar. COVID-19 indetiniń taralýyna jol ber­meý jónindegi vedomstvoaralyq komıs­sııa otyrysynyń qorytyndysy bo­ıynsha 1 naýryzdan bastap 7 kún boıy «jasyl aımaqta» turǵan óńirlerde sırkterdiń, bılıard klýbtarynyń, balalar oıyn-saýyq ortalyqtarynyń ju­mys isteýine (tolymdylyǵy 30%-ǵa deıin), sporttyq is-sharalardy ótkizýge (30%-ǵa deıin), juma namazyn oqýǵa (30%-ǵa deıin) jáne as berý rásimin ótkizýge (30%-ǵa deıin, 50 adamnan artyq emes) ruqsat etiledi. Buǵan qosa bir apta «sary aımaqtaǵy» óńirlerde jabyq bazarlardyń (azyq-túlik, azyq-túlik emes), saýda jáne oıyn-saýyq ortalyqtarynyń, saýda úıleriniń, saýda jelileriniń jeksenbi kúnderi jumys isteýine tyıym salynbaıdy.

Sonymen qatar monıtorıngtik tekserý qorytyndysy boıynsha bilim berý uıymdarynda sanıtarlyq-epıde­mı­ıa­­lyq talaptardyń buzy­lý fa­k­­ti­­leri kóp tirkelgen Mań­­ǵystaý, Qostanaı jáne Jambyl oblys­taryn qospaǵanda, barlyq oblysta 1 naýryzdan bastap 1-5 synyp­tar­dyń, halyqaralyq mektepterde 1-7 sy­nyptardyń oqýshylaryn aralas oqy­týǵa ruqsat etiledi.

Sondaı-aq Indýstrııa jáne ınfra­qury­lymdyq damý mınıstrliginiń Túr­kııamen (qosymsha 4 reıs), О́zbekstanmen (+4 reıs), Qyrǵyzstanmen (+2 reıs) jáne Ýkraınamen (+1 reıs) halyqaralyq áýe reısteriniń sanyn arttyrý týraly usynysy komıssııanyń qoldaýyna ıe boldy.

Jalpy, jaman indettiń qursaýynan birjola qutqaratyn, qalypty ómirge ora­lý­ǵa septigin tıgizetin amal – vaksınalaý ekeni túsinikti. Elimizde aqpan aıynan bastap aq jeleńdi abzal jandardyń ózi bastap, biraz azamat koronavırýsqa qarsy ekpe aldy. Jospar boıynsha jyl sońyna deıin 6 mln-nan asa qazaqstandyq vaksınalanbaq. Bul rette óńirler ımmýnoprofılaktıka boıynsha halyqqa aq­pa­rat­tyq-túsindirý jumystaryn kú­sheı­týi qajet. Bul týraly Densaýlyq saqtaý mınıstrliginiń keńeıtilgen alqa otyrysynda vedomstvo basshysy Alekseı Soı aıtty.

Onyń aıtýynsha, E-gov mobile «Vak­sı­nalaý» jáne «Sıfrly qujat­tar» qyzmetindegi koronavırýsqa qarsy vaksınalaý pasporty arqyly egilgenderdiń esebin júrgizý jáne ımmýndyq jaǵdaıdy baqylaý josparlanýda. Bul vaksınalaý kólemin jáne aýrýdyń boljamyn josparlaýǵa kómektesedi. Vaksı­na­laý­dyń qolda bar nátıjelerin eske­re oty­ryp, osy jyldyń ekinshi jarty­jyl­dy­ǵy­na deıin epıdemııalyq jaǵdaıǵa boljam jasaldy.

«Búkil álem vaksınalaý ǵana qa­lyp­ty ómirge karantınsiz oralýǵa múm­kindik beretinin túsindi. Osyǵan baı­la­nysty óńirler ımmýnoprofılaktıka bo­ıyn­sha halyqqa aqparattyq-túsin­di­rý jumys­taryn kúsheıtýi qajet», dedi A.Soı. Mınıstr optımıstik jáne shynaıy boljamǵa sáıkes, jappaı maska taǵý rejimi, sondaı-aq áleýmettik araqa­shyq­tyqty saqtaý nátı­je­sinde eldegi epıdemııalyq jaǵdaı turaq­ta­la­tynyn jáne qatań karantındik shekteýge vaksına ǵana balama bolatynyn atap ótti.

Naýryz aıynan bastap vaksınalaýdyń kele­si kezeńi bastaldy. 1 naýryzdan bas­tap Nur-Sultan qalasynda da KVI-ǵa qarsy ekpeni muǵalimder, bala­baqsha tárbıeshileri, quqyq qorǵaý organ­da­ry­nyń qyzmetkerleri ala bastady.

Elordanyń Qoǵamdyq densaýlyq saqtaý basqarmasynyń málimeti bo­ıynsha bul topqa 15 myńnan asa adam kiredi. Osy sanattaǵy adamdardy vaksı­nalaý úshin Nur-Sultandaǵy 36 alǵash­qy medısınalyq-sanıtarlyq kómek uıym­darynda ekpe egý bólmeleri uıym­das­ty­ryldy. Sondaı-aq ekpe saldyrtýda vedomstvoaralyq uıymdar da qatysady. Muǵalimder men tárbıeshilerge vaksınalaý BMSK uıymdaryna bilim berý uıymy bekitilgen jeri boıynsha jasalady. Vaksına alatyndardyń tizimderi jasaldy, tıisti emhanalarǵa jiberildi.

Aqpan aıynyń basynan beri Nur-Sultanda barlyǵy 2 126 adam koronavırýs ınfeksııasyna qarsy ekpe aldy. О́tken demalys kúnderi basqarmanyń qoı­malaryna 7 myńnan asa jańa vaksına tústi.

 

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar