AQSh Jamal Hashshogı isin qaıta tergeıdi
Saýd Arabııasy AQSh-tyń jýrnalıst Jamal Hashshogıdi óltirý jónindegi tapsyrysty memlekettiń hanzadasy Mohammed bın Salman berdi degen aıyppen kelispeıtinin málimdedi.
Saýdııalyq jýrnalıst Jamal Hashshogı 2018 jyly Saýd Arabııasynyń Ystanbuldaǵy konsýldyǵynda óltirilgen bolatyn. Osyǵan baılanysty AQSh úkimeti jýrnalıst Saýd Arabııasynyń laýazymdy tulǵalarynyń «tapsyrysymen» óltirildi degen pikirin bildirdi. О́tken aptada Saýd Arabııasy Syrtqy ister mınıstri aıypty teriske shyǵaryp, aqparattyń jalǵan ekenin málimdedi.
Baıden ákimshiligi koroldikti kisi ólimine qatysty jaýapkershilikti ózine alýǵa shaqyrady. Bul oqıǵaǵa basqa memleketter men birqatar halyqaralyq uıym alańdaýshylyq tanytqan-dy. Máselen, Ulybrıtanııa bul istiń túbegeıli zerttelip, tergelýi kerektigin, oǵan qosa, osy ólimge qatysty degen kúdikke ilingen 20 laýazymdy tulǵaǵa sanksııa jarııalaıtynyn málimdedi.
BUU-nyń sottan tys máseleler boıynsha arnaıy ókili Agnes Kallamard áleýmettik jelidegi paraqshalarynyń birinde AQSh-tyń daıyndaǵan qujaty Saýd Arabııasy úkimetiniń bul oqıǵaǵa qatysy baryn joǵary deńgeıde dáleldedi degen pikirimen bólisti. «Endi AQSh úkimeti de bul qylmysqa qatysty jaýapkershilik tanytyp, keleshekte halyqaralyq mehanızmde osyndaı qylmystyń aldyn alyp tıisti jazasyn berýde óz ornyn tabýy tıis. AQSh Mohammad bın Salman hanzadaǵa sanksııa jarııalasyn», deıdi ókil. Bul málimdeme Baıdenniń saýdııalyq hanzadaǵa qatysty taqqan aıybynan bir kúnnen keıin jarııalandy.
Hanzada bolsa, qylmys áshkerelengen kúnnen beri bul oqıǵaǵa qatysty jaýapkershilikti alatynyn, alaıda oǵan «tapsyrys bermegenin» málimdedi. Degenmen, jaýapty tulǵalar jýrnalıst ólimine qatysty 8 adamdy tapqanyn habarlaǵan-dy. Úkimet olardyń kim ekenin áli ashyp aıtpady.
Domınıkan shekarasyn shegendeıdi
Domınıkan Respýblıkasy shekarasyn shegendegisi keletinin habarlady. El prezıdenti Lýıs Abınader Gaıtımen shektesetin aımaqty naqtylap, eki arada shekara turǵyzǵysy keletin nıetin bildirdi.
Resmı aqparat boıynsha, atalǵan jerdegi aımaq 380 shaqyrymdy quraıdy eken. Prezıdent bul sheshimin aradaǵy zańsyz kóshi-qonǵa núkte qoıyp, mashına urlaý men esirtki tasymalyn toqtatý qajettigimen túsindirdi.
Abınader shekara shegendeý jumysy bıyldan qalmaıtynyn málimdedi. Eki el Karıb araldaryn bólisip otyr. Al Gaıtı – sol aımaqtaǵy eń kedeı memleket. Eki el arasyndaǵy qatynas áýelden shıeleniske toly. «Aldaǵy eki jyl ishinde kórshiles elder arasyndaǵy máselelerge núkte qoıyp, urlanǵan zattar, esirtkiniń tasymalyn toqtatýǵa kúsh salamyz. Aradaǵy problemaly aımaqtarda eki qatarly shekara salynady. Sonymen qatar ondaı jerlerge kamera ornatýdy josparlap otyrmyz», dedi prezıdent.
Joba quny ázirge belgisiz. Degenmen Domınıkan úkimeti jobasyn daıyndap, shekara belgileý boıynsha jumysqa kirisip ketken.
Eki el arasyndaǵy shıelenister, negizinen osy kóshi-qon máselesine qatysty týyndaıdy. Domınıkan Respýblıkasy halqynyń sany – 11 mıllıon. Degenmen, ondaǵy zańsyz júrgen Gaıtı azamattarynyń sany mıllıonǵa jetip jyǵylady. Bıyl qańtarda Domınıkan úkimeti Gaıtı úkimetinen elden jyraqta júrgen azamattaryna arnaıy qujat berip, bul máseleni baqylaýyna alýdy tapsyrǵan edi.
2015 jyly Gaıtı Domınıkan Respýblıkasynan myńdaǵan azamatyn josparly túrde eline qaıtarý baǵdarlamasyn toqtatýdy suraǵan bolatyn. Al óz Otanyna oralýdy qalamaıtyn adamdar eki el shekarasynda lagerler quryp, sol jaqta ómir súretin. Bul máseleniń sheshimi tabylmaı júrgenine 100 jylǵa jýyq ýaqyt ótti. Domınıkandyqtardyń endigi úmiti – jańa josparda.
Daıyndaǵan
Svetlana ǴALYMJANQYZY,
«Egemen Qazaqstan»
