Bilim berý uıymdaryna óńirlerdegi sanıtarlyq-epıdemıologııalyq jaǵdaıdy eskere otyryp, oqý pánderiniń tizbesin derbes aıqyndaý quqyǵy berildi. Sondaı-aq, mektepter shtattyq nemese qashyqtyqtan oqytý kezinde saǵat sanyn ózderi belgileýge quqyly. Bul rette mektepter osy oqý jylynda qoldanylyp júrgen jumys oqý josparlaryn basshylyqqa alýy tıis.
«Bilim jáne ǵylym mınıstrligi «Kórkem eńbek» jáne «Mýzyka» pánderin qashyqtan asınhrondy formatta ótkizýdi usyndy. Qalǵan pánderdiń barlyǵyn 1-5 synyp oqýshylary shtattyq formatta oqıtyn bolady. Densaýlyq jaǵdaıy boıynsha naýqas jáne naýqaspen baılanysta bolǵan balalar qashyqtan oqı alady. Erekshe jaǵdaılarda, naýqastanǵan nemese naýqastarmen baılanysta bolǵan jaǵdaıda, bilim alýshylarǵa ata-analarynyń ótinishi boıynsha qashyqtan bilim alýǵa ruqsat etiledi. Sabaqtan tys ýaqytta 15 adamnan aspaıtyn toptarda oqýshylardy jeke oqytýǵa ruqsat etilgen. Bul qashyqtan oqytý formatynda bilim alatyn 6, 7, 8, 10 synyp oqýshylaryna qatysty. Sabaqtan tys ýaqytta jeke oqytý týraly sheshim pedagogtar men bilim alýshylardyń ata-analarynyń ózara kelisimi negizinde qabyldanady», - dedi vıse-mınıstr.
Bilim jáne ǵylym mınıstrligi bilim berý prosesine qatysýshylardyń barlyǵyna sanıtarlyq-epıdemıologııalyq talaptardy saqtaý qajettigin eskertedi. Mektep basshylary balalardyń qaýipsizdigi men densaýlyǵyn saqtaý úshin barlyq jaǵdaıdy qamtamasyz etýge mindetti. О́z kezeginde, bilim alýshylar men pedagogtar jeke gıgıena erejelerin jáne sanıtarlyq qaýipsizdik sharalaryn saqtaýy tıis. Sondaı-aq, ata-analar tarapynan balalardyń jeke gıgıenany saqtaýy men áleýmettik qashyqtyqty saqtaý qajettigin túsindirý óte mańyzdy.
Balabaqshalarda kezekshi toptar óz jumysyn jalǵastyrady. Kolledj ben JOO-larda bilim berý prosesi osyǵan deıingi qaýlyda bekitilgen formatta júrgiziledi, ıaǵnı 1-kýrs stýdentteri aralas formatta oqýdy jalǵastyrady, ózgerister bolǵan joq.
