Qazaqstannyń Reseıdegi elshisi Ermek Kósherbaev "Alash" qozǵalysyn bıyl 30 jyldyq mereıtoıy atap ótiletin Qazaqstan Táýelsizdiginiń jarshysy bolǵanyn atap ótti. "Alash" qozǵalysy qyzmetiniń kóptegen aspektileri tarıhı ádilettilikti qalpyna keltirý, qalyń buqaranyń habardar bolýyn qamtamasyz etý jáne jalpy qazirgi Qazaqstan úshin tarıhı mańyzy turǵysynan áli ashylǵan joq. Bul-tarıhshy-ǵalymdardyń aldynda turǵan mindet.
Álıhan Bókeıhanovtyń nemere inisi, Máskeý memlekettik tehnologııalyq ýnıversıtetiniń professory Nurym Bókeıhanov óziniń keńestik ómirinde ataqty týysynyń esimi aıtylmaǵandyǵymen, onyń ákesi osyǵan baılanysty qıyndyqtarǵa tap bolǵanyn (ýnıversıtetten shyǵaryldy, sodan keıin jumystan shyǵaryldy) aıtty. "Degenmen, ákem bizge jaqsy bilim bere aldy, men hımık boldym. Ol týysqany retinde Álıhan Bókeıhanovty aqtaý týraly ótinish jazdy. 1989 jyly biz kópten kútken jáne ádil sheshimmen hat aldyq", – dedi Nurym Bókeıhanov.
Reseı Ǵylym akademııasynyń Reseı tarıhy ınstıtýtynyń jetekshi ǵylymı qyzmetkeri, tarıh ǵylymdarynyń doktory, professor Dına Amanjolova Álıhan Bókeıhanovty tek qazaqstandyq ǵana emes, sonymen qatar eýrazııalyq aýqymdaǵy tulǵa dep atady. "Ol kóp qyrly tulǵa, bilimi boıynsha, tájirıbesi boıynsha kópshilikten joǵary, sol kezdegi qazaqtar arasynda jalǵyz kásibı saıasatker bolǵan. Álıhan Bókeıhanovtyń jeke basy úlgi-ónege bolýy kerek jáne bizdiń keń eýrazııalyq tarıhymyzdyń aıasynda qabyldanýy kerek. Biz úshin qanshalyqty qaıǵyly bolsa da, tarıhty baısaldy, qurmetpen, sabyrly este saqtaý mańyzdy", – dedi Dına Amanjolova.
Tarıh ǵylymdarynyń doktory, tarıh jáne áleýmettik-saıası zertteýler ınstıtýtynyń dırektory (Novosıbırsk qalasy) Vıktor Kozodoıdyń pikirinshe, Álıhan Bókeıhanov jalpymemlekettik, jalpy ımperııalyq deńgeıdegi saıasatker. "Tarıhta ár halyqtyń osyndaı deńgeıdegi qaıratkerleri bola bermeıdi. Bókeıhanov pen onyń serikteri sol kezdegi qazaq zııalylaryn óz aınalasyna biriktire aldy jáne avtonomııanyń ıdeıalyq, mádenı, aǵartýshylyq negizderin qurdy, ol aldymen odaqtas respýblıkanyń negizi boldy, sodan keıin Qazaqstan táýelsizdiginiń bastaýshysy boldy", – dep atap ótti Vıktor Kozodoı. Ol bıylǵy jyly Álıhan Bókeıhanovtyń kitabyn basyp shyǵaratynyn jáne sol arqyly onyń jeke basyn zertteýdegi olqylyqtyń ornyn toltyratynyn, onyń ústine Reseıde "Alash" basshysynyń ómiri men qyzmetine arnalǵan birde-bir kitap joq ekenin aıtty.
