Teatr • 03 Naýryz, 2021

Qazaq valsiniń koroli

81 ret kórsetildi

Nur-Sultan qalasy ákimdiginiń Mýzykalyq jas kórermen teatry súıikti kórermenderiniń nazaryna jańa premerany tartý etti. 1 naýryz kúni Qazaqstan Respýblıkasy Táýelsizdiginiń 30 jyldyǵyna oraı Shámshi Qaldaıaqovtyń ómiri men shyǵarma­shylyǵynan kórinis beretin «Shámshi» mıýzıkliniń premerasy ótti. Avtory – Madına Omarova, qoıýshy rejısseri – Qazaqstannyń eńbek sińirgen qaıratkeri Ashat Maemırov, rejısserdiń assıstenti – Mekan Djýmabaev.

Qoıylymnyń tusaýkeseri Alǵys aıtý kúnimen tus­pa-tus kel­gendikten teatr ujymy qo­ǵam­­da paıdaly ári ıgi ispen aına­lysyp júrgen volonterlerdiń eńbegin eleýdi jón kórdi. Olarǵa alǵys bildirý maqsatynda spektaklge 30-ǵa jýyq jas erikti arnaıy shaqyryldy. Teatr dırektory, Qazaqstannyń eńbek sińirgen qaıratkeri Ashat Maemırov: «Qıyn kezeńde kómek berip, mem­le­kettiń kóterip jatqan úlken jú­gine aralasyp, teńizge tamǵan tam­shydaı bolsa da, úlken eńbek etken­derińiz úshin myń rahmet», dep premerany alǵyspen bas­tady.

Qoıylym belgili tulǵanyń kú­reskerlik, ǵashyqtyq jáne kom­pozıtorlyq qyrlaryn tany­tady. Naqtyraq aıtqanda, kú­resker Shámshiniń rólin Aman Ǵu­marov, kompozıtor Shámshiniń rólin Sultan Keńshilik, ǵashyq Shámshiniń rólin Salamat Muqa­shev somdady. Úsh akter sahna aldynda kompozıtordyń ómir jo­lynda kezikken qıyndyqtaryn, adam men qoǵamǵa degen fılosofııasyn, ishki jan dúnıesindegi tolqyǵan sezim ıirimderin, ǵa­shyq­tyq syrlaryn áýezdi ánder ar­qyly kórermenderge jetkize bildi. Sonymen qatar qonaqtar mıýzıklde Muqaǵalı Maqataev, Roza Baǵlanova, Ábilahat Espaev, Tólegen Aıbergenov, Jumeken Nájimedenov, Aqan seri syndy tulǵalardyń beınelerin kez­des­tirip, olar Shámshiniń ónerin qalaı qoldap, shyńdala túsýine qandaı septigin tıgizgenderine kýá boldy.

Mýzykalyq jas kórermen ­teatry «Shámshi» mıýzıkli arqy­ly óner jolyna qyzyǵýshylyq­pen qaraıtyn daryndy jasóspirim­­der men balalardyń qııalyn qoz­ǵap, olardy ónerge qyzyqtyryp, qa­nattandyrdy. Qoıylymdy tama­shalaǵan jas kórermen Shámshi­ge qarap, onyń shyǵarmashylyǵy­na zer salyp, kúrdeli ómir jolyn­daǵy kıeli ónerdiń ba­ǵasy adamzat ǵumyryn arnaýǵa turatyndaı qudiretti de taza eken­digine kóz jetkizdi.

Erqanat Tashen «Astana jas­tary» uıymynda volonterlikpen aınalysyp kelgenine eki jyldan asty. Ol qoıylymnan alǵan áseri erekshe ekenin jetkizdi.

– Eki jyldan beri osy volon­terlik ispen aınalysamyn. Al­ǵash­qyda ekologııaǵa baılanys­ty uıymdarǵa bardym. О́ıtkeni kóktem aılarynda, qar erigende jerdiń betinen turmystyq qal­dyq zattardan kózimizdi arylta almaımyz. Bul tabıǵatqa úlken zııan ákeledi. Osydan keıin men turǵyndarǵa úıden shyqqan qal­dyqty suryptap, olardy arnaıy ydystarǵa salýdy jáne jınaý­dy nasıhattaımyn,  – deı­di E.Tashen.

Álemdi ábigerge salǵan pandemııa kezinde belsendi azamattyq ustanymdary joǵary eriktiler qoǵamǵa aıtarlyqtaı septigin tıgizgen. Eli­mizde óz erki­men qo­ǵamǵa paıdasyn tıgizýdi kózdeıtin eriktilerdiń qatary jyl sanap artyp keledi.

Teatrdaǵy Kameralyq or­kes­tr­­diń súıemeldeýimen ótken spek­taklde kompozıtordyń 15-ke jýyq áni oryndaldy. «Jan aǵa», «Arys jaǵasynda», «Ánim sen ediń», «Qaıyqta», «О́mir ózen», «Baqyt qushaǵynda», «Saǵy­nyshym meniń», «Qýanysh valsi», «Aq mańdaılym», «Sy­ǵan áni», «Aqan seri», «Ana tý­raly jyr» jáne ózge de án­deri kórermen kóńi­lin baýrap, júrek túkpirindegi meıirimi men mahabbatyn oıata tústi. Qala tur­ǵyndary men qo­naq­tary «Shám­shi» mıýzıklin 3 naýryz kúni tamashalaı alady.

 

Sońǵy jańalyqtar

15169 adam koronavırýs juqtyrdy

Koronavırýs • Keshe

Uqsas jańalyqtar