Oblystyq TJ departamentiniń bastyǵy, general-maıor Jasulan Jumashevtiń óńirlik kommýnıkasııalar qyzmeti alańynda ótken brıfıngide málim etkenindeı, Oral qalasy, Tasqala, Qaztalov jáne Báıterek aýdandary eń qaýipti aýmaqtar qataryna jatady. Jasulan Qydyrǵojaulynyń sózine qaraǵanda, eldi mekenderdi sý basý qaýpiniń úsh deńgeıi anyqtalǵan.
Atap aıtqanda, 27 eldi meken sý basýdyń joǵary, 50 aýyl ortasha, taǵy 8-i tómen deńgeıine jatqyzylǵan. Qazirgi tańda «Qazgıdromet» RMK BQO fılıalynyń málimeti boıynsha qardyń bıiktigi – 35 sm, topyraqtyń qatý kórsetkishi – 35-69 sm. Shyńǵyrlaý, Shejin 2, О́leńti jáne Shiderti ózenderinde ylǵal qory qalypty deńgeıde. Derkól men Shaǵan ózenderinde kóp jyldyq kórsetkishterden 13-16 paıyzǵa tómen.
«Oblystaǵy kóktemgi sý tasqyny shekaralyq ózenderdiń tabıǵı aǵysyna ǵana emes, sonymen qatar Reseı aýmaǵynda ornalasqan sý qoımalarynan jiberiletin sý kólemine de baılanysty. Osy oraıda reseılik áriptestermen sý tasqyny, atap aıtqanda, Orynbor jáne Saratov oblystaryndaǵy Irıkla men Varfolomeev sý qoımalaryn qaýipsiz jáne ózara tıimdi paıdalaný máseleleri boıynsha ózara aqparat almasyp otyramyz», dedi J.Jumashev.
Oǵan qosa túsken qardy ýaqtyly jınap, qala men eldi mekenderden der kezinde shyǵarýdyń da mańyzy zor. Qazirgi kezde erigen qar sýynyń basý qaýpi bar ýchaskelerdi tekserý jumystary júrgizilýde. Kúni búgin eldi mekenderden 494 myńnan astam tekshe metr qar shyǵaryldy. 1150-den astam tekshe metr erigen sý soryldy.
Kóktem kezindegi tótenshe jaǵdaılardy joıý jumystaryna 2591 adam, 734 tehnıka, 45 júzý quraly, 295 motopompa tartylmaqshy.
Oblys boıynsha túrli sıpattaǵy tótenshe jaǵdaılardy joıýǵa rezervte 1,5 mlrd teńge qarastyryldy. Eske sala keteıik, budan buryn Batys Qazaqstanda taǵy bir respýblıkalyq jol jabylǵanyn jazǵan bolatynbyz. Búgin barlyq baǵyttar boıynsha jol ashyq.
