Elordadaǵy Jaqsylyq Úshkempirov atyndaǵy jekpe-jek saraıynda ótken kezdesýde jerlesterimiz 5:2 esebimen jeńiske jetti. Matchtyń esebin 2-mınýtta Shyńǵys Esenamanov ashsa, araǵa 19 mınýt salyp ol dýbldiń avtory atandy. Sondaı-aq 8-mınýtta Birjan Orazov, 14-mınýtta Leo mergendigimen kózge tússe, oıyn aıaqtalýǵa eki mınýt qalǵanda Dáýren Tursaǵulov kezdesýdiń núktesin qoıdy. Jerlesterimizdiń 5 golyna qonaqtar tek eki golmen jaýap qatty. Alǵash Sergeı Krykýn bizdiń qaqpany dál kózdese, keıinnen Iýrıı Rabyko óz atyn tabloǵa jazdyrdy.
Bul jeńisten keıin Qazaqstan quramasy óz tobynda alty upaımen jeke-dara kósh bastady. Úsh upaıy bar Belarýs Majarstan quramasymen birge ekinshi jáne úshinshi oryndardy bólisip tur. Belarýs pen Qazaqstan quramasy arasyndaǵy qarymta kezdesý 8 naýryzda Mınskide ótedi.
