Qoǵam • 05 Naýryz, 2021

Bıikten qaraıtyn bıbi

135 ret kórsetildi

Pavlodarlyq Natalıa Saharova kran júrgizýdi armandamaǵan. Bul salada jumys isteý josparynda da bolmapty. Alaıda Jaratýshy ıeniń jospary bólek qoı. Náp-názik qyzdy krannyń basqarý tetigine ákep otyrǵyza salǵan. Al bárin «búldirgen» bástesý bolatyn.

– Kranda jumys isteımin dep esh oılamappyn. Biraq mańdaıǵa jazylǵan taǵdyrdan qashyp qutyla almaısyń ǵoı. 2017 jyly qurbymmen bástestim. Ol kran júrgizý qolyńnan kelmeıdi dedi. Men úırenip alatynymdy aıttym. Sóıtip, jumysshy mamandyqtarǵa baý­lıtyn Pavlodar qalasyndaǵy kásibı oqytý jáne saraptama ortalyǵyna bardym. Alty kún tájirıbeden óttim. Birden unady. Búginde súıikti mamandyǵyma aınaldy. Jumysqa erekshe qulshynyspen baramyn. Ujymym da unaıdy. Osy oraıda, Baǵdat Jurymbaeva esimdi tájirıbeli áriptesime alǵysym zor. О́zime beımálim bolyp kelgen salanyń qyr-syryn osy kisiden úırendim, – deıdi kran mashınısi Natalıa Saharova.

Ol – Baıanaýyldyń týmasy. Tútini túzý, tirligi qyzý Birlik aýylynda týyp-ósken. Osy jerde mektep bitirip, úlken ómirge qadam basqan. Qazaqtardyń arasynda óskendikten, qazaqshaǵa jetik. Mektepti memlekettik tilde támamdaǵan. Pavlodardaǵy kolledjderdiń birinde «Baǵdarlamashy» mamandyǵyn meń­ge­ripti.

– Krannyń túri kóp qoı. Osy kúnge deıin kópirli jáne tirekti krandardy júrgizip kórdim. Endigi bir armanym – munaraly kranǵa otyrý. Biraq qurylys alańyndaǵy mundaı tehnıkadan qorqa­ty­nym jáne bar. Sebebi tym bıikte júretin munaraly krannyń jumysyna aýa raıy qatty áser etedi. Tıisinshe, jazataıym oqıǵalar da jıi bolyp turady. Degenmen, qyzyǵýshylyǵym joq emes. Astanaǵa birneshe márte jumysqa da shaqyrdy. Ázirshe munaraly kranda jumys isteýge daıyn emespin. Biraq túbi bir bul tehnıkany da tizgindeımin. О́ıtkeni ulym meni munaraly krannan kórgisi keledi, – deıdi keıipkerimiz.

Natalıa búginde Pavlodar qala­syn­daǵy iri zaýyttardyń biri – KSP Steel kásipornynda jumys isteıdi. Buǵan deıin úsh jyl metallýrgııalyq óndirispen aınalysatyn «Kastıng» kompanııasynda eńbek etken.

– Ádette, kópshilik kranda jumys isteýdi erlerdiń isi dep biledi. Men muny áıelderge arnalǵan jumys der edim. О́ıtkeni bul zergerlik jumyspen para-par. Yjdahattylyqty, muqııattylyqty, jaýapkershilikti, tózim­dilikti qajet etedi. Mundaı shar­ýaǵa erlerdiń júıkesi shydaı ber­me­ıdi. Máselen, bizdiń ujymdaǵy kran­dardyń bárinde áıelder jumys is­teı­di. Kópirli, tirekti krandar qyz-kelin­shek­terge arnalǵandaı. Bul onyń ońaı jumys ekenin bildirmeıdi. Munyń da óz qıyndyǵy bar. Tórt qabatty úı­diń bıiktigindeı jerde jumys isteý eshqashan ońaı bolǵan emes. Árıne, mu­na­­ra­ly kranmen salystyrǵanda qaýip tómen. Biraq aýyr-aýyr metaldardy tıeý, túsirý, bir orynnan ekinshi orynǵa kóshirý de aýqymdy jumys, – deıdi Natalıa Saharova.

Ulty orys bolǵanmen, jany qazaq Natalıa qazaq tilin úırený úshin orta kerek dep esepteıdi.

– Bir úıde bes qyzbyz. Bárimiz qazaqshaǵa jetikpiz. Qazaqtardyń orta­synda óskendikten, tárbıemiz de qazaqy. Obal-saýap pen ar-uıattyń ne eke­nin kishkentaı kúnimizden boıǵa sińirip óstik. Qazaqtyń salt-dástúrin de bir adamdaı bilemiz. Kúndelikti tirligimizdiń ózi qazaqylanyp ketken. Qonaq kelse qýanyp, qabaǵymyzdy emes, tabaǵymyzdy usynyp, máre-sáre bop jatamyz. Dastarqanymyzdan et, baýyrsaq arylǵan emes. Bizdiń qoǵam memlekettik tilde tegis sóıleýi úshin qazaqy orta qalyptastyrý kerek. Sonda ǵana qazaq tiline degen qajettilik týyndaıdy, bul tilde sóıleý basymdyqqa aınalady. Bir ul tárbıelep otyrmyn. Ol da qazaqsha túsinedi, sóıleıdi. Onyń qazaqy tárbıe alǵanyn qalaımyn, – deıdi Natalıa.

Bıikten qaraıtyn bıbiniń ómirdegi shyǵar bıigi de alasarmasyn demekpiz.  

Sońǵy jańalyqtar

Minsiz – kim?

Rýhanııat • Keshe

Semeıdegi serpilis

Aımaqtar • Keshe

Uqsas jańalyqtar