Naýryz kóktem aıy sanalǵanymen, Pavlodar óńiri úshin sýyq, qarly, borandy kezeń bolyp tabylady. Ásirese borandy kúnderi aýlalardy, joldardy, alleıalardy qar basady. Sondyqtan da Pavlodar oblysynyń polıseıleri eldi mekenderdiń tazalyǵy men jergilikti turǵyndar men kásipkerler tarapynan abattandyrý erejelerin saqtaýǵa erekshe kóńil bóledi.
– 2021 jyldyń basynan bastap oblysta abattandyrý erejelerin buzýdyń 1130-dan astam deregi anyqtaldy. Barlyq quqyq buzýshylar QR ÁQBtK-niń 505-baby(Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý) boıynsha ákimshilik jaýapkershilikke tartyldy, – dedi Pavlodar oblysy PD Jergilikti polısııa qyzmeti basqarmasynyń bastyǵy Ǵalym Sarǵulov.
Onyń aıtýynsha, atalǵan bapqa sáıkes osyndaı quqyq buzýshylyqtar eskertý jasaýǵa nemese 300 aılyq eseptik kórsetkishke deıin aıyppul salýǵa ákep soǵady. Máselen, osyndaı faktiler 8 naýryzda anyqtaldy. Saǵat 11.00 shamasynda PB kezekshi bólimine Estaı kóshesindegi úıdiń janynda ornalasqan mınımarketke kirý qar men muzdyń tazartylmaýyna baılanysty múmkin emes ekenin, sonyń saldarynan arbamen júre almaıtynyn aıtyp qala turǵyny habarlasty.
Atalǵan mekenjaıǵa kelgen polıseıler dúken dırektoryna qatysty QR ÁQBtK-niń 505-baby boıynsha ákimshilik hattama toltyrdy. Oǵan eskertý jasaldy. Dúkenniń janyndaǵy qar men muz qysqa ýaqytta tolyǵymen tazartyldy. Dál sol kúni polısııaǵa osyǵan uqsas taǵy bir qońyraý kelip tústi. Qala turǵyny Toraıǵyrov kóshesindegi dúkenniń janyndaǵy joldyń taıǵaq ekenin habarlady.
– Onda júrý óte qaýipti, taıyp ketý jáne qulaý qaýpi bar. Dúkenge qart adamdar men balalar da kiredi, – dep shaǵymdandy er adam. Tártip saqshylary bul fakt boıynsha da ákimshilik hattama toltyryp, dúken ıesine eskertý jasady.
Budan basqa, polısııa qyzmetkerleri uıym ıelerin, jeke kásipkerlerdi sanaly bolýǵa, irgeles aýmaqtardyń tazalyǵyn qamtamasyz etýge jáne qala turǵyndarynyń jaýapkershiligi men qaýipsizdigin este saqtaýǵa shaqyrady.
