2021 jylǵy 1 shildeden bastap Ákimshilik rásimdik-prosestik kodekstiń kúshine enýine baılanysty búkil sot júıesiniń jumysyn qaıta retke keltirý talap etiletin bolady. Máselen, Qazaqstan Respýblıkasynyń «Sot júıesi jáne sýdıalardyń mártebesi týraly» Konstıtýsııalyq Zańyna ózgerister qaraldy. Bul túzetýler Joǵarǵy sotta ákimshilik ister jónindegi alqa qurýdy jáne qazirgi bar mamandandyrylǵan sot alqasyn joıýdy kózdeıdi.
«Bul ózgerister ákimshilik ádiletin engizý jaǵdaıynda da júktemeni teń bólýge, teris áreketter men jarııa daýlardy qaraý jónindegi sot tájirıbesiniń arajigin ajyratýǵa múmkindik beredi jáne adamdardyń konstıtýsııalyq quqyqtary sotpen qorǵalýyn qamtamasyz etýge yqpal etetin bolady», dedi zań jobasyn ázirleýshilerdiń biri komıtet tóraǵasy Vladımır Volkov.
Zań jobasynda sonymen qatar Joǵarǵy Sot sýdıalary laýazymyna úmitkerlerge qoıylatyn keıbir talaptardy ózgertý qarastyrylǵan.
Depýtattar ınvestorlardyń qatysýymen bolatyn daýlardy jańasha qarastyrýdy usynady. Sottar men sýdıalarǵa júktemeni teń bólý, sondaı-aq birkelki tájirıbe ázirleý basty maqsat bolyp otyr. Sondyqtan «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» zań jobasynda osyndaı isterdi barynsha muqııat qaraý, memlekettik organdarmen daýlarda ınvestısııalyq daýlar boıynsha úsh býyndy qorǵaý júıesin belgileý arqyly ınvestorlardyń quqyqtaryn qorǵaýdy arttyrý maqsatynda mamandandyrylǵan sottar arasyndaǵy sottylyqty ózgertý usynylyp otyr. Qazir daýlar eki býyndy júıe arqyly qaralady, bul ınvestorlar úshin túsinbestik týǵyzyp keledi.
«Zań jobasynda mamandandyrylǵan sottardyń saqtalýyn, sotpen qorǵaýdyń úsh satyly tolyqqandy júıesin jáne Qazaqstan Respýblıkasy Joǵarǵy Sotyndaǵy sot alqasynyń kassasııalyq is júrgizetinin eskere otyryp, daýlardy ınvestorlardyń qatysýymen ınstansııalaýdy aıqyndaý usynylady», dedi senator Sáýle Aıtpaeva.
Parlamentshiler keńeıtilgen otyrys barysynda «Ákimshilik quqyq buzýshylyq týraly kodekske ózgerister men tolyqtyrýlar engizý týraly» zań jobasyn da talqylady. ÁQBtK-den «Joǵarǵy Sottyń mamandandyrylǵan sot alqasy» degen uǵymdy alyp tastaý usynylady. Bul aǵymdaǵy jyly ákimshilik rásimdermen jáne jarııa quqyqtyq qatynastar salasyndaǵy daýlardy sheshý jónindegi arnaıy sot isin júrgizýge baılanysty qoǵamdyq qatynastardy retteýge baǵyttalǵan Ákimshilik rásimdik-prosestik kodekstiń engizilýine baılanysty.
