Bárin basynan bastaıyn. 2014 jyldan beri Oral qalasynda turdyq. Kúıeýim Aıbek esh jumystan tartynbaıtyn eńbekqor edi. Kóbine qurylys jumysymen aınalysyp, otbasyn taryqtyrǵan joq. Sońǵy kezde Oral qalasynyń irgesinde saıajaı úıin aıyna 15 myń teńgege jaldap turdyq. Sýdy daladan tasyp, ot jaǵyp otyrsaq ta oǵan renjimedik. Kishi qyzymyz Aılına dúnıege kelgen soń «kóp balaly otbasy» atanyp, memlekettik járdemaqy ala bastadyq. Otbasynyń kirisi kóbeıip, bolashaqtan úmitimiz kóp edi. Átteń...
Qańtardyń 11-i esten keter me? Jańaqalanyń Qyzyloba aýylynan Oralǵa taksımen shyqqanbyz. Jol apatynyń qalaı bolǵanyn da bilmeımin. Balalarmen kóliktiń artqy jaǵynda otyr edim. Qarsy kele jatqan júk kóliginiń sońynan shyǵa kelgen atyraýlyq taksı biz mingen kólikke týra soǵylypty. Bizdiń júrgizýshiniń aıaǵy syndy, janynda otyrǵan jolaýshy áıel sol jerde til tartpaı ketti. Meniń kúıeýim Aıbekti Jedel járdem Aqjaıyq aýdandyq aýrýhanasyna jetkizgenimen, eki kún es-tússiz jatyp, qaıtys boldy. Bizdiń kóliktegi jolaýshylardyń bári zardap shekti. Úlken ulym Ádilbek pen eki jasar Almıramnyń ıyǵy synǵan, Aqerkemniń sol aıaǵy syndy. Eki aılyq Aılınam ekeýmizdi perishte qaqqan shyǵar, sábıim moınyn aýyrtyp alǵanymen aman qaldy. Qıyn kúnder ótti ǵoı, shyryldap balalarymnyń janynda, aýrýhanada júrdim...
30 jastan asa bere 4 balamen jesir qalý ońaı ma? Úısiz-kúısiz jetim qalǵan balalarymnyń bolashaq taǵdyryn oılap, qaıǵydan qan jutqanym ras. Degenmen, halqymyzdyń «Qaıǵyny bólisse, azaıady» degeni ras eken. Bizdiń jaǵdaıymyzdy estip, áleýmettik jelide el-jurtqa jarııa salǵan Aıbolat Bókenov degen azamat boldy. Buryn tanymaıtyn, bilmeıtin bloger jigit bizdiń otbasynyń basyna túsken qaıǵyny ózinikindeı qabyldap, birneshe jazba jarııalapty. El aǵalaryn, qaıyrymdy jandardy uıymdastyrypty.
Bizge eń aldymen kómekteskender – Oral qalasy ákiminiń orynbasary Baqytjan Narymbetov pen Oral qalalyq máslıhatynyń depýtaty Nurgúl Ashyqova. Depýtatymyz bizge ýaqytsha panalaý úshin jaıly páter jaldap berdi. Dári-dármekpen, qarjylaı kómekteskender kóp boldy. Eń úlken qajettiligimiz – baspana edi. Osy kezde ortaǵa «Hareket» qaıyrymdylyq qory aralasyp, qarjy jınaýǵa kiristi. Qordyń respýblıkalyq basshysy Gúlmıra Muqanqyzy, jergilikti fılıal tóraǵasy Demejan baýyrymyz bir aı ishinde tıisti qarjyny jınap, Oral qalasynyń irgesinen – Terekti aýdany Podstepnoı aýylynan 2 bólmeli jaıly páterdiń kiltin qolymyzǵa ustatty. 3 jyl buryn qurylyp, talaı jannyń alǵysyn alyp júrgen «Hareket» qorynyń uıymdastyrýymen baspanaly bolǵan 410-shy otbasy biz ekenbiz. Bul qandaı qýanysh deseńizshi?!
Jańa baspanamyz óte jaıly, jyly, balabaqsha tıip tur eken. Mektep te alys emes. Ázirge ulym Ádilbektiń sabaǵy qashyqtan júrip jatyr ǵoı. Qalǵan qyzdarym úıde.
«Teńiz tamshydan quralady» demekshi, barsha járdemdesken adamdarǵa myń san rahmet aıtamyn. Eń bastysy, bizdiń basymyzǵa túsken qaıǵyny jurtqa jarııalap, qoldaýshy bolyp, basy-qasynda júrgen Aıbolat Bókenovke alǵysym sheksiz. Biz sııaqty qıyn jaǵdaıda qalyp, kómekke muqtaj bolǵan jandardy qýantyp júrgen «Hareket» qoryna myń alǵys, Alladan qaıtsyn!
Adam balasy basyna qıyn kún týǵanda qaýmalaǵan halqynyń qadirin anyq biledi eken. Kútpegen jerden kelgen kesapat bizge sony uqtyryp ketti.
Ádemi ÁBIShEVA,
kóp balaly ana
Batys Qazaqstan oblysy
