Áıteýir adam aman. Oqys oqıǵaǵa jedel nazar aýdarǵan qala ákimi Nurlybek Nálibaevtyń tapsyrmasymen shahar basshysynyń orynbasary Bektas Nurıdınov órtten zardap shekkenderge bardy.
Qutqarý qyzmetine Sabalaq saıajaıy Pobeda kóshesi nómirsiz meken-jaıda órt oryn alǵany týraly habarlama 9 naýryz kúni saǵat 22:20 shamasynda kelip túsken eken. Atalǵan oqıǵa ornyna shuǵyl jetken órt sóndirý bóliminen 3 tehnıka, 8 qyzmetker jumyldyrylyp, 23:35 shamasynda jalyn tolyq sóndirilgen. Boljam boıynsha órt peshtegi aqaýdan paıda bolýy múmkin. Qazir saraptama taǵaıyndalyp, órttiń shyǵý sebebi anyqtalýda.
Úıdi Saǵynysh Dáýletova eki qyzymen jáne múmkindigi shekteýli ógeı ákesimen birge panalap kelipti. Jergilikti bılik ókilderi mán-jaıdy kózben kórip, qajetti sharalar tizbegin jasaqtady.
Otbasy jaldamaly páterge ornalastyrylady. Páterdiń jaldaý quny Tasbóget kenti ákimdigi arqyly óteletin bolady. Aldaǵy ýaqytta olardy ýaqytsha baspanaǵa ornalastyryp, úı kezegine tirkeý jumystary jasalady. Oqysta qıyn jaǵdaıǵa tap bolǵandardy azyq-túlik, qajetti kıim-keshekpen qamtamasyz etý de demeýshilik esebinen sheshimin tapqan.
«Saǵynysh Dáýletovanyń anasynyń atyna tirkelgen úıge qatysty quqyq menshigin anyqtap, qujattaryn qaıta rásimdeýge jiberemiz» degen qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysy Indıra Aqjigitova otbasyǵa bir rettik memlekettik járdemaqy taǵaıyndalatyndyǵyn da atap ótti.
