Fılmniń bas prodıýserleri Ásel Sádýaqasova, Qanat Bıtemirov jáne Erbol Toıbaev. Bul Erjanovtyń osy júldege tórtinshi ret qatysýy. Buǵan deıin ár jyldary «Úkili Kámshat», «Qaratas aýylyndaǵy oba» jáne «Álemniń erke enjarlyǵy» fılmderi usynylǵan bolatyn.
«Sary mysyq» – Erjanovtyń toǵyzynshy tolyqmetrli kórkem fılmi. Kartınanyń álemdik premerasy byltyr 77-shi Venesııa kınofestıvaliniń «Kókjıekter» konkýrstyq baǵdarlamasynda ótti. Keıinirek týyndy birqatar festıvalge qatysyp, birneshe marapatqa ıe boldy. Sonyń ishinde Qytaıdaǵy Silk Road IFF festıvaliniń «Arnaıy syılyǵy», Batýmı kınofestıvalinde «Úzdik rejısser» syılyǵy, sondaı-aq «Máskeý premerasy» festıvalinde kınosynshylardyń arnaıy júldesine ıe bolǵan.
«Bul – biz úshin úlken qýanysh. Bizdiń komandanyń birlesken kúsh-jigeriniń, eńbeginiń baǵalanǵanyna óte qýanyshtymyn. «Sary mysyq» komandasyn fılmniń kezekti jetistigimen quttyqtaımyn!», dedi rejısser Ádilhan Erjanov.
Fılmde qazaqstandyq «Bonnı men Klaıdtyń» oqıǵasy baıandalady. Qylmysqa belshesinen batqan jas jigit Kermek pen túzý joldan bet burǵan qyz Evanyń mahabbaty sýrettelip, oqıǵa ekeýiniń arasyndaǵy qıyndyqtar men álemge qarsylyqtary turǵysynan órbıdi. Kermektiń rólin reseılik akter Azamat Nıgmanov oınaǵan, ony kórermen Alekseı Mızgırevtiń «Konvoı» jáne Andreı Shalopanyń «28 panfılovshy» fılmderinen biledi. Evanyń rólin jas qazaqstandyq aktrısa Kamıla Nuǵmanova oınap shyqty, ol buryn Narıman Tórebaevtyń «Grıaz bolshogo goroda» jáne Álisher Súleımenovtiń «Oblako na kryshe» fılmderinde oınaǵan. Eki akter úshin de «Sary mysyq» Ádilhan Erjanovpen yntymaqtastyqtyń alǵashqy tájirıbesi. Krımınaldyq avtorıtet Jambastyń rólin Erjanovpen birge jumys istegen, onyń «Atbaıdyń shaıqasy» jáne «Ulbolsyn» fılmderinde oınaǵan akter Sanjar Mádı somdap shyqty. Sondaı-aq fılmge Erjanovpen birge birneshe ret jumys istegen akterler – Erken Gýbashev pen Erjan Jamanqulov qatysty.
Ssenarıı avtorlary – Ádilhan Erjanov pen Inna Smaılova. Prodıýserler, dástúrli túrde rejısserdiń burynnan kele jatqan seriktesteri — Serik Ábishev pen Olga Hlasheva. Ko-prodıýser Gııom de Sıel. Fılmniń operatory – Erjanovpen «Úkili Kámshat» jáne «Atbaıdyń shaıqasy» fılmderinde jumys istegen Erkinbek Ptyralıev. Qoıýshy-sýretshi – Ermek О́tegenov. Al fılm mýzykasyn kompozıtorlar Alım Zaırov pen Ivan Sınsov jazǵan.
