Palata basshysy Úkimettiń 2019 jyly bekitken elimizde týrızmdi damytýǵa arnalǵan memlekettik baǵdarlamada 2025 jylǵa deıin jalpy ishki ónimdegi týrızmniń úlesin 8 paıyzdan kem qylmaýdy qamtamasyz etý jóninde tapsyrma bar ekenin aıta kele, óńirdegi jaǵdaıǵa toqtaldy.
«Bizdiń óńirimiz geografııalyq jaǵdaıy, sondaı-aq klımaty da qolaıly, mádenı-tarıhı mura nysandaryna baı, týrızmdi damytý úshin úlken áleýetke ıe aımaq. Respýblıkalyq týrıstik kartaǵa oblystyń 3 týrıstik nysany engizilgen. Olar: Qamystybas demalys aımaǵy, Jańaqorǵan shıpajaıy jáne Baıqońyr týrıstik aımaǵy. О́tken jyldan bastalǵan pandemııa bul salany da aınalyp ótpedi. Bul jaǵdaıda týrıstik fırmalar ǵana emes, qonaq úı, meıramhana, jol boıy keshenderi men ózge de salaǵa qyzmet kórsetetin kásipkerlik sýbektileri aıtarlyqtaı zardap shekti, áli de ońala almaı otyr», - deıdi Palata dırektory.
Kásipkerler palatasynyń sala kásipkerleri arasynda júrgizgen saýalnamasynyń nátıjesi birqatar máselelerdi anyqtaýǵa múmkindik berdi. Týrızm salasyndaǵy bıznes ókilderi nesıelerdi tóleýge qarajattyń jetispeýshiligin, qyzmetkerlerine jalaqy tóleý problemalaryn, shtattardyń qysqarýyn, sondaı-aq kommýnaldyq tólemderdi tóleýdi negizgi másele retinde kórsetip otyr.
Kásipkerler palatasynyń dırektory ózge óńirlerdegi jaǵdaıdy saralaı otyryp, kórshi Shymkent qalasynda ótken jyly týrızmdi damytýǵa 125,7 mln, Almaty qalasynda 51,3 mln, al Almaty oblysynda 29,4 mln teńge bólingendigin jetkizdi. Osy qarjylar aıasyndaǵy satyp alýlar týrızm basqarmalary arqyly júzege asyrylǵan. Qarajat aqparattyq-ımıdjdik qoldaý, beınerolıkter men jarnamalyq rolıkter, kádesyılar, atrıbýttar, polıgrafııa ónimderin shyǵarý, jarnama qurylymdaryn jasaý, aqparattyq kıosk satyp alý, ekskýrsııalyq qyzmetterdi uıymdastyrý jáne basqa maqsattarǵa qoldanylǵan.
Munan ózge, jyl basynan beri Shymkent qalasynda týrızmdi nasıhattaýǵa arnalǵan qyzmetterge memlekettik tapsyrys jarııalanyp, kórshi óńir bul baǵytta belsendi jumysyn bastap ketken eken.
Palata basshysy Ǵalymbek Jaqsylyqov bul máseleni aımaq basshylyǵyna jazbasha da, kezdesý barysynda da jetkizgenin aıta kele, salany damytýǵa qatysty bergen usynystarymen bólisti.
Birinshiden, 2021 jylǵa arnalǵan «Jumyspen qamtýdyń jol kartasy» jobalarynyń tizimine týrıstik nysandardy ınfraqurylymmen qamtamasyz etý jobalaryn qosýdy usyndy. О́tken jyly atalmysh Jol kartasy aıasynda oblys boıynsha 40 mlrd teńgeni quraıtyn 291 joba júzege asyrylǵan. Alaıda ishinde týrızm salasyndaǵy ınfraqurylymǵa arnalǵan birde bir joba joq eken.
Ekinshiden, týrızmdi damytý jónindegi is-sharalardy qarjylandyrýǵa jergilikti bıýdjetten qarajat bólý.
Úshinshiden, úkimettik emes uıymdardy tarta otyryp, memlekettik áleýmettik tapsyrys tetigi arqyly týrıstik salanyń áleýetin ilgeriletýge qatysty áleýmettik mańyzy bar jobalardy júzege asyrý.
Tórtinshiden, «Qyzylorda» óńirlik ınvestısııalyq ortalyǵy arqyly týrızm salasyndaǵy jobalardy nesıelendirýge arnaıy qarajat bólý.
