Kezdesý barysynda parlamentaralyq baılanystar arqyly eki el arasyndaǵy yntymaqtastyqty odan ári nyǵaıtý jaıynda sóz boldy. Senat Tóraǵasy Qazaqstannyń Eýropa men Azııanyń túıisken tusynda ornalasýynyń strategııalyq mańyzy bar ekenin aıtyp, elimiz jaqsy ınvestısııalyq ahýal qalyptastyrýǵa basa mán beretinin jetkizdi.
«Biz óńirde qolaıly ınvestısııalyq ahýal qalyptastyra aldyq. Byltyrǵy qarasha aıynda Memleket basshysynyń tapsyrmasymen Parlament Salyq kodeksine engizilgen túzetýlerdi qabyldady. Investısııanyń kólemine, merzimine jáne jumys ornyna baılanysty ınvestorlar 10 jylǵa deıin korporatıvti, jer, qosymsha qun salyqtarynan jáne múlikke salynatyn salyqtan bosatylady», dedi Máýlen Áshimbaev.
Sonymen qatar Senat Tóraǵasy elderimiz arasyndaǵy mádenı-gýmanıtarlyq baılanystardyń da nátıjeli damyp kele jatqanyn tilge tıek etti. Palata Spıkeri brıtanııalyq joǵary oqý oryndary qazaqstandyq stýdentter men Qazaqstan Respýblıkasynyń Tuńǵysh Prezıdenti – Elbasynyń bastamasymen qolǵa alynǵan «Bolashaq» baǵdarlamasynyń stıpendıattary arasynda joǵary suranysqa ıe ekenin de atap ótti. Sondaı-aq, ol byltyrǵy qarasha aıynda Ulybrıtanııada tarıhta alǵash ret aǵylshyn tilinde «Abai. Book of Songs» atty Abaı ánderiniń jınaǵy jaryq kórgenin, bul uly oıshyldyń muralaryn dáripteýde asa mańyzdy ekenin aıtty.
Budan basqa, Máýlen Áshimbaev Ulybrıtanııa tarapyn osyǵan deıin ótken Álemdik jáne dástúrli dinder lıderleriniń sezderine qatysqany úshin alǵys bildirdi. Sondaı-aq, anglıkan shirkeýiniń ókilderin aldaǵy forýmǵa jáne onyń Hatshylyǵynyń jumysyna qatysýǵa shaqyrdy.
«Bizdiń elimizdiń bastamasymen Álemdik jáne dástúrli dinder lıderleriniń sezi ótkizilip kele jatqany belgili. Qazirgi tańda bul Sezd álemdegi rýhanı kóshbasshylardyń jańa zamandaǵy ózekti máselelerdi talqylaıtyn bedeldi forýmyna aınaldy. Biz Anglıkan shirkeýiniń basshylyǵyna Sezd Hatshylyǵynyń jumysyna belsendi qatysyp kele jatqany úshin alǵysymyzdy bildiremiz», dedi Senat Tóraǵasy.
Máýlen Áshimbaev óz sózinde Qazaqstan Parlamentiniń Senaty eki eldiń arasyndaǵy parlamentaralyq yntymaqtastyqty odan ári nyǵaıtý úshin tıisti jumysty jalǵastyra beretinine de toqtalyp ótti.
