Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri, birqatar mınıstrliktiń basshylary, ǵylymı qaýymdastyqtar men halyqaralyq uıymdardyń ókilderi osy másele boıynsha ózderiniń saraptamalyq pikirlerin ortaǵa saldy.
«Organıkalyq ónim óndirýshilerdiń tizilimin júrgizý, óndirisi men aınalym erejelerin, sondaı-aq ony óndirýde qoldanylatyn ruqsat etilgen quraldardyń tizimin belgileıtin «Organıkalyq óndiris týraly» zań 2015 jyly qabyldanǵan bolatyn. Alaıda salalyq komıtet ókili Álı Bektaevtyń aıtýynsha, bul baǵyt áleýeti men perspektıvalaryna qaramastan, tıisti deńgeıde damı alǵan joq.
«Negizgi problemalardyń biri osy saladaǵy zańnamanyń jetildirilmeýi, organıkalyq ónimdi jáne ony óndirýdi sertıfıkattaýdyń ulttyq júıesi men organıkalyq ónimdi biryńǵaı tańbalaý ınstıtýtynyń bolmaýy bolyp otyr. Osy jáne basqa da faktorlar saladaǵy bıznesti damytýǵa nıet bildirýshilerge tusaý bolýda», dedi senator Á.Bektaev.
Senator Aqylbek Kúrishbaev óz kezeginde organıkalyq óndiris jónindegi EO reglamentimen jáne basym ótkizý naryqtarynyń shetel memleketteriniń standarttarymen balamaly ulttyq standarttardy ázirleý qajettigin atap ótti.
«Organıkalyq ónim óndirisi men aınalymyn esepke alý men qadaǵalaýdyń qazirgi zamanǵy júıesin engizý, Qazaqstannyń organıkalyq óndirisiniń biryńǵaı ınternet-portalyn qurý, organıkalyq ósimdik sharýashylyǵyna jaramdy tuqymdar men otyrǵyzý materıaldarynyń tizilimin jasaý qajet», dedi A.Kúrishbaev.
Aýyl sharýashylyǵy mınıstriniń orynbasary Nurbek Daıyrbekov qazir organıkalyq ónim óndirý jáne onyń aınalymy salasyndaǵy ulttyq zańnamany jaqsartý, atap aıtqanda ulttyq jáne halyqaralyq standarttarǵa sáıkes ekologııalyq taza organıkalyq ónimniń sáıkestigin rastaý jáne baqylaý jónindegi ulttyq organdardy qurý jáne tirkeý jónindegi sharalar pysyqtalyp jatqanyn aıtty.
Saýda jáne ıntegrasııa mınıstriniń orynbasary Erjan Qazanbaev organıkalyq ónimderdi tehnıkalyq retteý jáne eksporttaý, qazaqstandyq brendterdi nysanaly naryqtarǵa ilgeriletý jáne sarapshy-aýdıtorlarǵa qoıylatyn ruqsat berý talaptaryn bekitý jónindegi sharalar týraly baıandady.
Dóńgelek ústel barysynda aıtylǵan usynystar keıin múddeli taraptarǵa jiberiletin usynymdarda kórinis tabatyn boldy. Senat depýtattary sonymen qatar osy jyly organıkalyq ónim óndirý máseleleri jónindegi zań jobasyn ázirleýge bastamashy bolmaqshy.
