Aımaqtar • 16 Naýryz, 2021

Eldi elge, joldy jolǵa jalǵaǵan

156 ret kórsetildi

Bir júrgen jan azabyn ońaılyqpen umyta qoımaıtyn «Qyzylorda – Jezqazǵan» joly elimizdiń ońtústik aımaqtaryn ortalyqpen baılanystyryp turǵan uly sorap. Respýblıkalyq mańyzy bar trassa degen aty ǵana, kóp jyldan beri jóndeý kórmegen joldyń keıbir úzikterinde ertede tóselgen asfalttyń juqanasy ǵana qalǵan. Jezqazǵanǵa deıingi 400 shaqyrymnyń ár burylysyn jattap alǵan júrgizýshilerdiń aıtýynsha, kúre joldyń Qyzylorda oblysyna qarasty bóliginiń jaǵdaıy jaman emes. Al 120 shaqyrymdyq aýmaqqa tipti qıyrshyq tas ta tóselmegen, kóktem men kúzde jol tabany mı batpaqqa aınalyp shyǵa keledi.

El ekonomıkasyndaǵy mańyzy joǵary jol osydan jarty ǵasyr buryn túsken. Sekseninshi jyldary Qyzylorda bóligindegi 127 shaqyrymǵa Mańǵystaý óńirinen ákelingen bıtým tóseldi. Biraq sodan beri talaı márte másele retinde kóterilgenimen de, agrarly aımaq pen mysty óńirdi jalǵaǵan jol eleýsiz qalyp keldi. Soǵan qaramastan, myńdaǵan kólik júrgizýshi osy baǵytpen júrgendi durys kóredi. Shý baǵytyna qaraǵanda bul jol Qyzylorda men Nur-Sultannyń arasyn 700 shaqyrymǵa jaqyndata túsedi. Sondyqtan qystyń kúnderi bul jolmen jolaýshy tasymaldaǵandar júrse, kún jylyna ońtústikten ortalyqqa aýyl sharýashylyǵy men baqsha ónimderin, qurylys materıaldaryn tasyǵan kólikter kerýeni jolǵa shyǵady. Mamandardyń aıtýynsha, kúre jolmen táýligine 1 myńnan astam kólik qatynaıdy.

Syrdyń bas qalasy men kenshiler shaharynyń aralyǵy «Qyzylorda – Pavlodar – Ýspenka – RF shekarasy» dep atalatyn kúre joldyń bir bóligi. Osyǵan deıin jyl aralatyp «Jóndeýge qarjy bólinetin boldy» degen jaqsy habar dúrkin-dúrkin estilgenimen, kúre jol keıpi ózgere qoıǵan joq. Kóligi buzylyp jolda qalǵandardy qınaıtyny – uıaly baılanystyń joqtyǵy. Jolaı ótken bireý járdem bermese, eski jyrdaǵy er Tólegenge uqsap aspandap ushqan alty qazdan sálem aıtýdan basqa amal joq. Bul qutqarýshylar úshin de qıyn tıip otyr.

 – Bizge kóbine jolda qalǵan kólikter jaıly habardy júrgizýshiler jetkizedi, – deıdi Qyzylorda oblystyq TJD bastyǵynyń orynbasary, polkovnık Saıd Moldaqaraev. – Eger baılanys bolsa, jolaýshynyń qandaı jaǵdaıǵa dýshar bolǵany tez anyqtalar edi. Jolda qalǵandarǵa kómek kórsetýde ýaqyttan da utylmas edik.

Joldaǵy medısınalyq qutqarý pýnktteriniń joqtyǵy da oqys jaǵdaıǵa ushyraǵandarǵa jedel kómek kórsetýge qolbaılaý bolyp otyr. Mamandardyń dereginshe, Qyzylorda men Jezqazǵan arasynda 2018 jyly 2 jol-kólik oqıǵasy bolyp, 2 adam zardap shekken, 2019 jyly eki apattan bir jolaýshy qaıtys bolyp, ekeýi jaraqat alǵan. Byltyrǵy 3 oqıǵadan 4 adam zardap shegip otyr. Jalpy, «Qyzylorda – Pavlodar – Ýspenka – RF shekarasy» boıynda sońǵy 5 jylda júzdegen apat bolǵan.

Sóz basynda aıttyq, joldyń Qyzylorda oblysyna qarasty bóliginiń jaǵdaıy jaqsy. 127 shaqyrymynda asfalt bar, qalǵan 60 shaqyrymyna qıyrshyq tas tóselgen. «Qazavtojol» UK» AQ oblystyq fılıaly mamandary osy aýmaqty ishinara jóndep, qoqys pen qardan tazartyp, jol belgilerin ornatyp, kútip ustap otyr.

Jýyrda fılıal ujymy uzaq jyldan beri aıtylyp kele jatqan máseleniń sheshimi jaqyn qalǵanyn habarlady. Fılıal dırektorynyń orynbasary Shanjarhan Myrzabaı «Qyzylorda – Pavlodar – Ýspenko – RF shekarasy» avtomobıl jolynyń Qyzylorda – Jezqazǵan bóligindegi 12-215 shaqyrymy aralyǵyn qaıta jańǵyrtýdyń jobalyq-smetalyq qujattary daıyndalǵanyn aıtyp otyr.

«Qazjoljoba» men «Semjoljoba» jaýapkershiligi shekteýli seriktestikteri jobalaǵan jumystar aıasynda buryn oblysta qoǵamdyq tyńdaýlar ótkizilgen. Mamandar usynysy men turǵyndardyń pikir-paıymy ekshelgen joba boıynsha joldyń eni uzaryp, 9 metrge jetedi.

– Sonymen qatar, Qyzylorda qalasyna tolyǵymen jaryqtandyrylǵan aınalma jol salyp, «Qyzylorda – Jezqazǵan» kúre jolynyń uzyndyǵy 204 shaqyrymdyq qaıta jańǵyrtylatyn bóliginde aýyl sharýashylyǵy tehnıkalary men úı janýarlaryna arnalǵan ótkelder, 3 kópir, 2 aralyq baqylaý arkasyn, demalys alańdary men mal ótkelderin salý qarastyrylǵan. Quny 106 mlrd teńge bolatyn joba 3 jylǵa josparlanǵan, – deıdi «Qazavtojol» UK» AQ oblystyq fılıaly dırektorynyń orynbasary Sh.Myrzabaı.

Qazir 204 shaqyrym boıynda jasalatyn jumys 6 lotqa bólinip, saraptamadan ótip, daıyn tur. Jaqyn arada oblysqa jobany qarjylandyratyn Eýrazııalyq damý bankiniń ókilderi kelip, aımaq basshylyǵymen kezdesý ótkizedi. Osylaısha, óńir jurty úshin asa bir ózekti másele óz sheshimin tapqaly tur.

 Mamandar joldyń jańǵyrýy aımaq damýyna erekshe bir serpilis beretinine senimdi. Avtomagıstral eldiń ońtústigi men ortalyǵyn, Reseı Federasııasyn tikeleı baılanystyryp, Syr óńirine ınvestısııa tartýdyń aıasyn keńeıtedi, týrıstik áleýetin arttyra túsedi. Júk tasymaly kóleminiń artýy óńirde kásipkerliktiń óristeýine sep bolady.

«Arqan boıy soqpaqtyń tusaý boıy tóteligi bar» degen. Qazir bul jolmen kórshiles Túrkistan oblysynyń azamattary kóp qatynaıdy, ara-tura jolaýshylar arasynan О́zbekstan eliniń azamattary da boı kórsetip qalady. Eger jol durystalsa, kórshi memleketten aǵylatyndar qatary az bolmaıyn dep tur. Bul da – oblys úshin úlken múmkindiktiń kózi. Mamandar osy bastama júzege asyp jatsa, Qazaqstan men О́zbekstan arasyndaǵy kezdesýlerde aıtylyp qalyp júrgen Qyzylorda – Buqara baǵytyndaǵy halyqaralyq jol qurylysy týraly máseleni kóterýdi jón sanaıdy. Árıne, ol – erteńgi kúnniń enshisindegi is. Túıindeı aıtqanda, Syr jurty eldi elge, joldy jolǵa jalǵaǵan jobanyń kelesheginen kóp úmit kútedi.

Sońǵy jańalyqtar

Aldaǵy úsh táýlikte kún sýytady

Aýa raıy • Búgin, 11:55

Facebook ataýyn ózgertedi

Álem • Búgin, 10:15

Almatyda qutqarýshylarǵa alleıa ashyldy

Aımaqtar • Búgin, 10:00

2228 adam koronavırýstan emdelip shyqty

Koronavırýs • Búgin, 09:30

Búgingi valıýta baǵamy qandaı?

Qarjy • Búgin, 09:28

20 qazanǵa arnalǵan aýa raıy boljamy

Aýa raıy • Búgin, 09:25

Sport jańalyqtaryna sholý

Sport • Búgin, 09:11

Qalalardy qalyń tuman basyp tur

Aımaqtar • Búgin, 09:07

Iаsaýı murasy – urpaqqa ónege

Aımaqtar • Búgin, 09:05

Sımfonııalar saltanaty

О́ner • Búgin, 09:04

«Qaırat» chempıondyqtan qur qaldy

Fýtbol • Búgin, 09:02

Qalamgerler qaýyshýy

Rýhanııat • Búgin, 08:59

Pikirsaıys jeńimpazdary anyqtaldy

Qazaqstan • Búgin, 08:55

Bas júlde ekeý boldy

Teatr • Búgin, 08:51

Mádenı dostyqty dáriptedi

О́ner • Búgin, 08:50

Jel elektr stansasy salynýda

Aımaqtar • Búgin, 08:48

«Batagóı» baıqaýy ótti

Aımaqtar • Búgin, 08:46

Jańa sport kesheni ashyldy

Aımaqtar • Búgin, 08:45

Tekeliniń granıti: tas ta tabys kózi

Aımaqtar • Búgin, 08:44

Iri ınvestorlar ilkimdi is bastaýynda

Aımaqtar • Búgin, 08:42

Aqtóbege «jeti oıynshyq» keldi

Qoǵam • Búgin, 08:38

Aýǵanstanǵa qaıtadan un sata bastady

Ekonomıka • Búgin, 08:32

Aýyldy damytýǵa basymdyq berilýde

Saıasat • Búgin, 08:18

Keńeske múshelikke saılandy

Saıasat • Búgin, 08:15

О́rkenıet ózegi – Ulyq ulys

Tarıh • Búgin, 00:35

Shyńǵystaýdyń Shákiri

Ádebıet • Keshe

Jany izgi jýrnalıst

Egemen Qazaqstan • Keshe

Halyqtyń tabysy ósken

Qoǵam • Keshe

Qazaqtyń qaıyrymdylyǵy

Qoǵam • Keshe

Uqsas jańalyqtar