Oıynnan keıin fýtbolshylar narazylyǵyn bildirdi. Máselen, «Astana» klýbynyń qorǵaýshysy Antonıo Rýkavına osyndaı alańda oınaǵanyna uıalatynyn jetkizdi.
«Ondaǵan mıllıon dollarǵa salynǵan stadıonnyń osyndaı ekenine uıalamyn. Búgin-erteń osy matchty búkil álem kóredi. Osylaısha Qazaqstan fýtboly jeter jerine jetti. Erteń-aq bári Qazaqstan fýtbolyn ájýaǵa aınaldyrady. Bizge keregi osy ma?», dedi A.Rýkavına.
Qart qurlyqtyń beldi komandalarynda ter tókken fýtbolshynyń sóziniń jany bar. «Túrkistan-Arena» – elimizdegi eń jańa stadıon. Keshen byltyr qoldanysqa berilgen-tuǵyn.
Ras, álemniń túkpir-túkpirinde jaýǵan jańbyrǵa qaramastan, fýtbol matchtary ótkiziledi. О́ıtkeni ondaǵy alańdarda sý aǵar júıesi jaqsy jumys isteıdi. О́kinishke qaraı, «Túrkistan-Arena» kez kelgen jaýynǵa shydas bermeıtin sekildi. Bul birinshiden.
Ekinshiden, stadıon qurylysyna ketken qarjy da nazar aýdarýdy qajet etedi. Túgel túrki áleminiń temirqazyǵy sanalatyn Túrkistanda salynǵan jańa arenaǵa nebári 7 myń adam ǵana syıady. Al onyń qurylysyna shamamen 35 mıllıon dollardaı qarjy jumsalypty. Salystyrmaly túrde qarasańyz, Italııadaǵy «Ýdıneze» klýbynyń stadıonyna 23,6 mıllıon dollar jumsalǵan. Bir sátte jasyl alańdaǵy oıyndy 25 myńnan astam kórermen tamashalaı alady.
Baýyrlas Túrkııa da jańa arena salýda eshkimge des bermeıdi. Máselen, «Sıvas Arena» stadıonynyń qurylysyna 20 mıllıon dollar, «Torký Arenany» salýǵa 20 mıllıon dollar, «Tımsah arenaǵa» 22 mıllıon dollar qarajat jumsalypty. Kórermen sany da anaǵurlym kóp.
Osydan biraz buryn Qazaqstan fýtbol federasııasynyń ókilderi «Túrkistan-Arenaǵa» at basyn tirep, alańnyń uńǵyl-shuńǵylyn tekserip qaıtqan edi. Olar sý jańa stadıondy ÝEFA-nyń búkil talaptaryna saı keledi dep qorytyndy shyǵarǵan-dy. Alaıda, mıllıondap qarjy jumsalǵan stadıon bir jyl ótpeı syr berdi.
Jalpy, qazaq fýtbolynyń mundaı masqaraǵa ushyraýy alǵash ret emes. Esterińizde bolsa, 2007 jyly Premer-lıganyń kezekti týrynda «Ekibastuz» ben «Almaty» fýtbol klýbtary kezdesken. Oıyn Ekibastuz qalasyndaǵy stadıonda ótken edi. Tolassyz jaýǵan jańbyrdyń kesirinen alańǵa sý tolyp, dop tebý qıyndaıdy. Alaıda oıyn toqtatylmady.
Keıinirek osy vıdeo ınternette tarap, búkil álemge kúlki bolǵanymyz bar. Sol kezde The Sun basylymy álgi vıdeo týraly bylaı dep jazdy: «Fýtbol tarıhynda sýda ótken alǵashqy oıyn. Mundaı jaǵdaıda dop tebý múmkin emes. Eger siz jartylaı sýǵa toly alańda ótken oıyndy kórseńiz, «Bul qandaı Premer-lıga?» deýińiz ábden múmkin. Alańnyń sýǵa tolyp ketkeni sonshalyq, tanker sýdy soryp úlgere almaǵan. Buryshtama tebeıin dep kelgen baıǵus oıynshy qoıǵan dobynyń sý ústinde qalyqtap júrgenine qarap tur».
The New England Sports Network (NESN): Endigi jerde Qazaqstanda birtúrli lıga bar ekenin bilip júretin boldyq. Oıyn sýǵa toly alańda ótken, qajet deseńiz ony dáleldeıtin vıdeo bar. Qysqasha klıpte oıynshynyń sý basqan alańda buryshtama dobyn qalaı tepkeni kórsetiledi. Qolaısyz jaǵdaıǵa baılanysty oıynshy buryshtama dobyn qolmen oryndaıdy. Alaıda, tóreshi aıaqpen durystap tebýdi buıyrǵan.
The Telegraph: «Eshkim oıynnyń keıingi shegerilgenin qalamaıdy. Biraq buryshta sý aıdap jatqan júk kóligine qarap-aq, oıyndy keıinge qaldyrýǵa bolatyny belgili. «Boratqa» enbeı qalǵan, biraq shyndyqty beıneleıtin vıdeodan tóreshi belgilegen buryshtama dobyn sý basqan alańda qolmen emes, aıaqpen oryndaǵanyn kóresiń».
Qalaı desek te, sheteldikter kezinde Qazaqstan fýtbolyna esi ketkenshe kúldi. Sodan beri 14 jyl ótse de jaǵdaı áli ózgermepti. О́kinishti-aq...
