Tártip saqshylarynyń arasynda vaksına aldymen turǵyndarmen tyǵyz baılanysta bolatyn, vırýs juqtyrý qaýpi joǵary polıseılerge salynady. Olardyń arasynda ýchaskelik polısııa ınspektorlary, potrýldik polıseıler, ıývenaldyq polısııa jáne basqa da qyzmetter bar.
Vaksına salmastan buryn mindetti túrde dáriger dene temperatýrasyn, júrek qaǵysyn, arterııalyq qan qysymyn, tynys alýyn jáne júrek-qan tamyrlary júıesin, aýyz qýysyn tekseredi, epıdemıologııalyq anamnez naqtylanady.
Vaksınasııaǵa tek ekpege qarsy kórsetkishi joq qyzmetkerler ǵana kirgizildi.
Potrýldi polısııa qyzmetiniń ınspektory Aıbek Quramysov vaksına alǵannan keıin ózin qalaı sezinip turǵanyn aıtty.
«Medısınalyq tekseristen keıin vaksınanyń birinshi komponentin aldym. О́zimdi qalypty sezinip turmyn, jumys ornyndamyn. Vaksınasııanyń vırýspen kúreste kómegi tıetinine senimdimin. Pandemııa bastalǵannan beri polısııa qyzmetkerleri túrli jaǵdaımen ushyrasyp, vırýs juqtyrý qaýpi joǵary aımaqtarda aldyńǵy shepte júr ǵoı», – dedi polısııa aǵa leıtenanty.
Aıta ketsek, vaksınasııa Nur-Sultan qalasy Polısııa departamentiniń emhanasynda ótti. Olarǵa Qaraǵandyda óndirilgen otandyq Gam-KOVID vaksınasy salyndy.
№85 mektep-lıseıiniń bastaýysh synyp muǵalimi Aınur Janserikova eń birinshi óziniń oqýshylarynyń qaýipsizdigi úshin vaksına qabyldaǵanyn atap ótti.
«Bizge naqty nusqama berildi jáne aldaǵy 3 kúnde bolýy múmkin sımptomdar týraly túsindirdi. Qysqa-nusqa, bári túsinikti jazylǵan. Biz elimizdiń azamaty jáne patrıottary retinde ekpe alý úshin keldik. Qanshama oqýshymen baılanysta bolamyz. Sondyqtan olardyń, ózimizdiń jáne jaqyndarymyzdyń qaýipsizdigi úshin vaksına saldyratyn boldyq. Bizdi eshkim kúshtep, májbúrlep jatqan joq. Ekpe saldyrýǵa taǵy 7 áriptesim birge keldi», – dedi Aınur Janserikova.
Ekpe salynatyn adamǵa prosedýra ótkizý algorıtmi kórsetilgen «pasıentter marshrýty» beriledi.
«Aldyn ala jasalǵan tizim boıynsha azamattardy ekpe salýǵa shaqyramyz. Jalpy tekserýden ótedi, qajetti málimetter beriledi. Odan keıin pasıenttiń kelisimi alynyp, ekpe salynady. Ekpeden soń 30 mınýt bizdiń baqylaýymyzda bolady. Eger eshqandaı allergııalyq reaksııa baıqalmasa úıine jiberemiz»,- dedi «Shıpager» emhanasynyń jalpy tájirıbe dárigeri Sandýǵash Zulpuharova.
Dárigerdiń aıtýynsha, 18 jasqa deıingi balalarǵa, júkti áıelderge, JRVI sımptomdary bar, sonymen qatar sońǵy 6 aıda koronavırýspen aýyrǵan azamattarǵa ekpe salynbaıdy.
Ekpe jasalǵannan keıin 3 kún boıy monshaǵa barýǵa, ıaǵnı ekpe ornyn sýlaýǵa bolmaıdy. Spırttik ishimdik ishýge jáne aýyr jumys isteýge de tyıym salynǵan.
Esterińizge salsaq, Qazaqstanda vaksınasııa kezeń-kezeńimen júrgizilýde. Birinshi kezeńde, koronavırýs ınfeksııasyna qarsy vaksınany ınfeksııalyq aýrýhanalardyń dárigerleri, jedel medısınalyq járdem stansııalarynyń, jansaqtaý bólimderiniń, aýrýhanalardyń qabyldaý bólimderiniń, sanepıdqyzmet jáne basqa da bólimderdiń mamandary qabyldady. 1 naýryzdan bastap vaksınasııanyń ekinshi kezeńinde polıseıler men muǵalimderge jáne medısınalyq uıymdardyń basqa da bólimderiniń qyzmetkerlerine ekpe salynýda. Al vaksınasııanyń úshinshi kezeńinde sozylmaly aýrýlary bar jáne basqa da sanattaǵy azamattar qamtylady. jyl sońyna deıin Qazaqstanda vaksına qabyldaǵan azamattar sanyn 6 mıllıonǵa jetkizý kózdelip otyr.
